朋友趁年尾搵裝修師傅執執間屋，所以暫時搬去啲serviceapartment住，佢執包袱時打電話畀敏妮呻，原來佢個衣櫃有幾套suit放咗成年都未着過，佢話：「套suit個cutting咁誇，好難着返工，都唔知嗰時點解會買，又嘥錢，又嘥地方。」
受朋友影響消費
點解？據敏妮嘅分析，呢位朋友好怕悶，得閒無事就鍾意搵啲手帕交去行街，據一啲分析講，好多人行街本來冇打算購物，但由於有朋友喺旁邊，情緒會特別高漲，購物慾就會提高。仲有，以敏妮呢位朋友嚟講，無啦啦買咗幾套唔啱用嘅suit，原因係佢同手帕交行街時，佢嗰位手帕交猛話件衫好睇、好襯佢，而敏妮朋友係一個好易受人影響嘅人，見手帕交咁講就心郁，結果就係一屋唔等使嘅嘢。
幾套suit，套套都過千蚊，莫講話家陣經濟唔好，唔知要捱幾耐，就算係好景，都唔好亂嘥錢。
從另一方面着眼，家陣潮流講環保，啲衫不但着都未着過，連價錢牌都未剪，丟咗佢真係好嘥。不過，好彩衣服可以回收，送畀有需要嘅人，但敏妮認識一啲年輕人，同樣因為友儕嘅關係，將啲零用錢買埋啲唔等使嘅公仔、裝飾物。佢哋後生唔識搵錢艱難，但作為家長嘅，好應該教吓佢哋。
停一停、諗一諗
偶然放縱吓自己當做獎勵，敏妮覺得無可厚非，但太容易受人影響而消費，並唔健康。敏妮朋友就諗咗個方法，避免自己再胡亂使錢，「敏妮，下次我要行街，一定搵你陪，因為每次我買嘢，你都一盆冷水潑落嚟，俾你哦完，我乜嘢買嘢嘅興致都冇晒。」佢唔講都唔知，原來敏妮喺佢心目中，係一個「管家」！其實，每次購物之前都停一停、諗一諗，年終慳番唔少。
溫敏妮
http://wanmanli.com/blogs/