高官消費騷被市民指有姿勢無實際，有錢不如做多啲善事。四川大地震災後大半年，一直關心內地兒童教育嘅苗圃行動，今個聖誕新年假期同35個熱心市民，出錢出力到甘肅文縣災區探望災民。團員之一嘅馮盛和話，以前只係出錢唔出力，今次親自去到災區，見到班細路天寒地凍要係板間課室上堂，覺得香港人真係好幸福。
佢個仔嘉聰隨行，話最擔心天氣凍老竇頂唔順，佢自己凍到隻手僵晒，反而當地小朋友主動拖住佢隻手，噓寒問暖，仲用兩隻小手包住嘉聰隻手，令呢位一生溫飽嘅香港仔，由個心暖到出嚟。馮氏兩仔爺噚日同其他團友返抵香港，團長歐豪話，以後會多搞同類籌款活動，希望市民親自體驗災情，捐多啲錢協助災區重建。