潮人話事：<br>CLOT老細現身　最接近潮神的男人

潮人話事：
CLOT老細現身　最接近潮神的男人

CLOT在潮童界人氣鼎盛，雖然潮神Edison身不在港，但他定時推出crossover潮物、拍張造型照，香港潮書一樣登，就連報紙港聞版不時報道：「百德新街又一條通宵等買褲的人龍。」畢竟這是一盤生意，Edison主外，總得有個好拍檔主內，KevinPoon作為CLOT另一位幕後老闆最近也由低調漸露梢頭，為最近推出CLOT×PSP的M-65親身示範，有心捧自己成為新一屆潮神？

記者：梁俊鵬
攝影：陳盛臣（部份相片由CLOT提供）

CLOT從來不變

係！係有點唔公平，約Kevin做專訪，劈頭埋嚟都係要提到陳冠希。Edison雖然未強勢回歸香港，但他對潮界的影響力從沒消退，得閒又upload幾張新相到CLOT的blog，他身上所穿的定必成為潮童炒賣的目標。Kevin都話這次事件對CLOT生意影響不大：「開頭都怕會有影響，不過就更加警惕我哋要將更多注意力放在產品上，要做實在嘅事。產品正，就找誰人宣傳也一樣多人鍾意。CLOT係一間公司，無話無咗邊個會唔掂，不過Edison始終係『大佬』，佢嘅創作力係無可代替。」兩位老闆雖身處兩地，但分工仍不變：「Edison着衫真有自己的態度，佢身形好正，做styling最適合。我就繼續睇住盤數。當然我哋都有不同network，要找品牌crossover就各自努力啦。」
各自修行，但又見Kevin身影出現在潮書之中，想將自己打造成新潮人？Kevin立即耍手擰頭：「我又唔高又唔靚仔，無諗過要成名，我享受無人識的生活，一心做好個品牌就夠。好似MichaelKors在美國夠勁啦！但幕後盤生意邊個搞到咁掂呢？無人知！我就想以此為目標。」在此非揶揄Kevin，其實以他在娛樂版出現的次數來講，小記之前未見過Kevin都已認得他了，既然他另有心志，我哋都係無謂硬捧他上潮界神枱吧。

■JunyaWatanabe恤衫、Balenciagasneakers襯streetfashionitems就係Kevin口中的mix&match。

■Kevin與Edison拜訪藤原浩的workshop時影低的，你睇Edison幾識sell自己品牌﹗

■與Edison一同合力影HeadporterPlus服裝的styling相。

潮童＝慳仔？

奇怪……最新的CLOT×Levi’s×MedicomToy的西瓜褲腳牛仔褲街上面還少見人着。從網上拍賣悟出個答案，原價二千幾，轉眼又炒到三千尾，個個掛住炒，邊個得閒着出街？Kevin作為老細，卻睇得好透徹：「見人排隊買CLOT嘅嘢，熱鬧當然開心，網上炒賣對我來講都只係一種幻象，正嘢量少自然有人炒。但係我又唔係刻意做超少量出來賣，只係我還未捉到供求balance。」Kevin笑言可以幫小記留一條牛，給我放上網bid，可見他其實是好open-minded的。另一個怪現象，就係偏偏有時舊款的限量版就一街都係，原來在網上可以輕易搵到假嘢。炒賣就話唔關自己事，俾人老翻喎，Kevin點忍呢？「開頭見有人抄就好激氣，但諗真點，每個人做事都有原因，CLOT唔賣得又點會有人做假貨？咁諗就覺得CLOT品牌做得幾成功。」
就係因為CLOT加上Edison人潮氣旺，令潮語中添上「潮童」一詞，Kevin就話唔知咩為之潮童。在小記的角度，潮童即係指一堆Edisoncopycat，一件CLOT，一條Fragment×Levi’s牛，踢多對VisvimChristo，一式一樣咁出街。Kevin對此居然答得好保守：「香港消費者精明咗，唔係話乜乜crossover就有人買，始終件貨要有料先得。咁有料就自然多人鍾意，香港咁細撞衫唔出奇。可能佢哋着完又賣畀其他人，咪好似周街都係咁着囉。」咦？將潮童解釋為慳家仔？Kevin會唔會好似考評局啲人咁俾人插㗎？

■同香港潮人特別friend底，與Nike的Anton（左一）熟咗，大把合作機會。

香港會變文化之都？

「賣唱片難賺錢，賣products賺得多呀……」Kevin輕輕帶過一句，未知就是否近年一眾明星紛紛出自家品牌的緣故？等等，Kevin有補充：「只不過香港人太focus在搵錢上吧。約三年前，CLOT未成立之時，我哋香港人都只會追其他國家的品牌，就連streetfashion都一樣。但係我同Edison都好想話畀人聽，香港唔係淨係得女人街同大排檔﹗」原來Kevin獲邀到藝發局幫手，為推廣香港年輕人的創意文化努力，怪不得咁重使命感。
但講本地品牌，李璨琛有Subcrew，最近又有用靚仔樣sell衫的吳彥祖加入Know1edge……香港咁細，容乜易鬥鬥吓本地品牌死晒？「本地品牌現在只係一個開始，圈內都是朋友，琛仔講得啱，『Unityispower』，我哋有競爭，但係大家會越做越好。香港雜誌多點寫本地品牌，講多點我哋設計背後的文化。最怕有人聽到Hiphop就以為係板仔，就係着闊褲。始終有文化修養，先會引到外國人留意。」

■Kevin身上的Levi’s×Fragment×村上隆牛仔褲由FragmentDesign設計師蒼石一樹送，同潮人做朋友真係好。

StreetFashion係講態度

好想知道，如果唔識Kevin嘅人睇完上面段字，係咪唔會聯想到佢都係一個潮流人呢？但一條Levi’s×MMJ爛牛就將佢潮人身份表露無遺。其實佢讀書時已認識Edison，追求嘅同我哋一般八十年代出世的細路差唔多，AirJordan系列、AirForce1、AirMax等經典波鞋款買齊，到現在做老細，依然要有件Visvim喺身，對Streetfashion不離不棄：「Streetfashion係一種態度，唔鍾意返屋企嘅人內心一定好street。好似Futura五十幾歲，你唔會覺得佢老咗會唔street。Nigo結婚一樣要着西裝，但係一除咗西裝，佢都好street。這種自我風格係要慢慢建立。」
每個人心中總有幾個fashionicons，要數時裝界的風雲人物：「KanyeWest就係嗰種只要係佢着出嚟，你一定會覺得型的一類，佢着過一對Lanvin波鞋令我覺得hi-fashion同streetfashion係可以混得埋！TK是我讀書時的前輩，佢當時出名收風快，由佢身上可以得到很多fashion知識，現在只要係佢推崇的，就自然成為潮物。」當然都有補幾句讚吓Edison，Kevin這位兄弟算係咁啦。