風水佬出書在報章大賣廣告，大字標題「準確預測奧巴馬遇刺日期」。
得啖笑，奧巴馬係乜水？行出中環有幾多人認識這位仁兄，風水佬搵奧巴馬造勢，以為順手牽羊，又唔使付出代言人宣傳費，沾沾自喜於撿到便宜。實情係點，唔使審，這條爛橋，唔會賣。花錢買運程書的香港人，最關心恒指幾時上番三萬點，幾時係撈底良機，大師唔該免費睇睇命盤，睇慈雲山師奶或者錦田大叔幾時可以發圍，一鋪上位，做到Ａ貨四叔。就算唔講錢，買風水書的OL和中女，目的只有一個，幾時可以釣到水魚，蹺埋手唔使do，留番曾蔭權一個蠢佬自我陶醉繼續getthejobdone。奧巴馬這個美國佬，就算是克林頓第二，艷遇排隊都輪唔到香港妹。他幾時遇刺，遇刺是不是吉人天相，關人鬼事。不如八卦徐子淇肚裏面那個是不是仔。
我信風水，但憎人長期靠點紅點綠呃食。這個時勢，這個2009，最不需要的書種就是風水書，最抵死的人是風水佬。新年願望，希望這些人勿再老點，戒絕掠水，回頭是岸，做番正行，去天文台見工啦。