畢：HappyNewYear！畢傑喺度祝波友贏錢贏爆莊！
牛：我牽牛都祝大家新年快樂！贏得多過上年！
畢：08年我推介最後一場英超，要侯城下盤，點知臨尾香，激死！
牛：呢啲冇計喎，有邊個球員想擺烏龍，我買「大」都賴晒嘢啦。
畢：算啦，場波補時階段都叫有搞笑嘢吖！無啦啦吹乜嘢手球先得㗎！
牛：咪係！艾舒利楊格縮晒手先中門楣，點會判12碼？球證發雞盲啫，呢球靠旁證好眼咋！新一年咪諗上年嘅衰嘢啦畢傑。
畢：早排買親波都冇心水，呢個禮拜西甲重開，終於搵個地盤落腳。
牛：係啦！始終唔熟唔賭，亂咁嘥彈藥嘅話，盞為追數而買波啫。
畢：周六西甲有場硬嘢，我就覺得馬體會作客華倫輸唔到囉。
牛：貼勝負？咪預我！呢場波淨係睇韋拿同阿古路大鬥射術，都值回票價啦！凌晨5點開波我都睇呀！
畢：牛兄，我意思係問你點睇場波？
牛：瞓喺梳化睇，用4隻眼一齊睇，因為我夜晚鍾意戴金絲眼鏡睇嘢。
畢：咪九唔搭八啦！我係問你覺得邊隊秤高啲呀？
牛：淨係睇兩隊嘅主攻踢法，我撐硬個入球「大」呀！
畢：吓？你淨係識買「大」？送你一首「一頭蠻牛，闖情場竟成為一頭蠻牛……我是牛，我是牛」。
牛：你咪理我！睇吓我個「大」中，定係你個下盤中囉！
畢：超！下期見。