香港政壇新人難出頭，樂壇都係，每年樂壇新人多到數唔晒，無奇招突圍而出難以企穩陣腳，隨時曇花一現，想年尾上台攞獎，你估容易？08年樂壇成績表未派完，已經有新人搶閘而出，呢位新秀冇台風、冇歌藝，嚴重缺乏觀眾緣，咁都夠膽出嚟撈，全靠後台硬淨。
邊位新人咁掂？佢洋名叫Donald，花名煲呔，家住禮賓府，出道40幾年，今年轉型，可能想博鯉魚翻身09發圍。
頂硬上唱現場
煲呔前晚做除夕倒數嘉賓，同四叔、田少等一齊喺尖沙嘴睇國金煙火，迎來09年，由左麟右李帶頭唱《朋友》，台上其他闊佬、名人都冇認真唱，惟獨煲呔揸住支咪大展歌喉。
09處男登台，煲呔睇落有少少怯場，初時顯得有少少忸怩，揸住支咪唔知唱唔唱好，第一句歌詞入唔到，完全唔令人意外，好彩唱多幾句之後，佢都跟到拍子，至於唱得好唔好聽，係好主觀判斷，八方暫不表態。
樂壇新人最棹忌口噏噏咪嘴，加上發生林妙可京奧假唱醜聞後，北京文化部嚴打咪嘴，煲呔仲夠膽咪嘴？唔怕俾領導人訓斥咩，所以佢頂硬上現場真唱，可惜唔熟歌詞。同煲呔同台唱歌嘅田少、郭炳江、四叔以及佢個仔李家誠，相比之下失色得多，冇乜人跟住譚校長合唱，煲呔交足功課，Paco睇到佢表演咁出眾，唔知會唔會考慮簽埋佢。
唱完歌都未夠，高歌一曲《朋友》後，煲呔逐一同台上貴賓握手，連田少都唔例外；佢同田少有幾friend，政壇內外眾所周知，煲呔扮friend道行高超，勁過好多姐仔，娛樂圈呢行飯，啱晒佢食。
做新人辛酸不足為外人道，有時連商場仔奀騷都要做，否則得罪人冇運行，呢一方面煲呔好識撈，據講佢出席倒數騷時，入場之際一班娛記喺場外影相，有個記者慢半拍影唔到煲呔，慘叫一聲交唔到差，煲呔聽到後，竟然行返轉頭做taketwo，仲定格企喺度擺揮手甫士幾十秒任影，咁識撈實襟撈，話唔定09年煲呔黑氣盡除，大紅大紫。
mailto:[email protected]