新一年開始冇耐，習慣上都會回顧吓08年發生過嘅大事。舊年樓市跌入谷底，對於地產代理行業嚟講，絕對係多事一年，要數發生過乜事，相信有排數。美聯就選咗08年代理業界10件大事，但華華睇完後覺得，用「08年美聯10件大事」為題，似乎貼切啲。
老闆預言列榜首
首先名列榜首嘅係「美聯主席黃建業於9月預視樓市踏入寒冬期，掀起行業進行一連串瘦身行動」。跟住美聯顧問張錦成搞嘅盈富地產全線執笠排第二，梁向榮大手買入美聯股票都打入三甲。就連美聯召回舊臣張錦成同黃錦康回巢，亦「順利入選」排第四。
反而舊年搞到滿城風雨嘅御龍山懷疑違規偷步賣樓事件，同埋地產代理持牌人數創有紀錄以來新高，都冇辦法喺三甲佔一席位，你話所謂嘅10大事件，有幾大嘞！