舊嘅唔去，新嘅唔嚟，新年伊始，華華最想知梗係今年有冇運行，好唔好入市低撈好股。除咗問一眾股評人，華華仲去咗問占星師Jupiter，佢話受水星逆行影響，09年股市波動，不過年中會有小陽春。佢提醒股民要特別留意1月、5月同9月呢3個月份，仲話有興趣趁低吸納嘅可以睇準機會入市。
Jupiter話，由於冥王星啱啱入咗山羊座，對基建、地產同大企業會有較大衝擊，起碼要調整一年，到2010年先會好轉。不過，由於木星進入水瓶座，對科技、創意行業同電燈都有利，一啲冷門嘅行業亦分分鐘有機會突圍而出。
四叔會經歷大轉變
舊年金融海嘯，唔少富豪大孖沙輸accumulator輸到儍，咁今年佢哋又會唔會繼續運滯呢？
Jupiter話處女座嘅彤叔鄭裕彤算係運程比較好嗰位，今年各方面都有改善同提升，只係權力地位有啲危機，但可以絕地反彈。中環財經圈，個個都知彤叔出名精靈，究竟有邊個會威脅到佢嘅地位呢？不過，Jupiter話彤叔嘅貿易生意，今年發展會更好，09年大豐收。
舊年自封「冒牌股神」嘅四叔李兆基屬雙魚座，今年會經歷大轉變，主要喺年中，生意上會有新嘅擴張機會，但怕佢諗得太理想，會過咗火位。有靚新抱徐子淇今年為四叔再添乖孫，相信點計，今年對四叔嚟講都係好年。
超人唔適合搞新嘢
至於獅子座嘅超人李嘉誠，今年最好就做番傳統業務，試新嘢就差啲喇，千祈唔好投資藝術、娛樂，反而做番地產會對佢最有利，另外，今年都適合同人合作，獨力做反而會因競爭大咗而有影響。
不過，小小超李澤楷今年運程就麻麻，天蠍座嘅佢今年受好多行星對冲，屬大變化一年，已建立嘅根基會有變化，想做嘅又未必做到，有啲阻滯！
仲有人馬座嘅賭王何鴻燊，09年遇上冥王星迎月亮，個人情緒同家庭方面會煩惱多多。佢嘅賭業王國好有機會擴張，但過程就充滿阻滯。
名人星座
‧李兆基 出生日期：3月6日 星座：雙魚座
‧李嘉誠 出生日期：7月29日 星座：獅子座
‧鄭裕彤 出生日期：8月26日 星座：處女座
‧吳光正 出生日期：9月5日 星座：處女座
‧唐英年 出生日期：9月6日 星座：處女座
‧任志剛 出生日期：9月9日 星座：處女座
‧郭鶴年 出生日期：10月6日 星座：天秤座
‧李澤楷 出生日期：11月8日 星座：天蠍座
‧邵逸夫 出生日期：11月19日 星座：天蠍座
‧何鴻燊 出生日期：11月25日 星座：人馬座
‧胡應湘 出生日期：12月3日 星座：人馬座
資料來源：蘋果資料室
李華華
mailto:[email protected]