新年伊始，希望09年股市首個交易日有個好開始。去年新股上市數目不多，但今年1月如無意外起碼先有兩隻登場，都係同能源業務有關，分別係海峽石化（852）及興業太陽能（750）。
去年港股牛去熊來，新股上市數目及公開發售反應難免冷清。按目前牌面，如果要揀上述兩隻新股，星俠較為喜歡海峽石化，因該公司除了從事石油貿易以外，亦涉足成品油及石化產品的倉儲經營業務；中國將積極建立戰略石油儲備，在投資角度上，這一點應可令海峽石化獲得加分。
油價近期因中東局勢緊張而反彈，市場有分析認為油價未升完，如果係咁，將對中石化（386）影響較大。不過，內地上月實施成品油定價改革後，將令國內成品油價貼近國際油價及加工成本，新制之下將使中石化煉油業務虧損情況大幅改善，甚至有望重新獲得盈利。公司管理層亦曾表示，集團煉油業務今年打「翻身仗」。
10日線跌穿20日線
中石化近期走勢麻麻，周三半日市微升0.02元，收報4.69元，但股價已微穿由低位3.50元延伸之上升軌支持，兼10日線跌穿20日線現死亡交叉，除非短期以大成交重返升軌之上，否則暫不建議買入。如果有貨，在跌穿4.47元宜先止蝕，候4元水平才考慮買回。
方星俠