雖然天主教教區主教陳日君樞機同聖公會大主教鄺保羅兩大宗教領袖開到口，叫高官同市民唔好亂咁消費，但高官消費騷長做長有停不了，噚日輪到政制及內地事務局局長林瑞麟出場，喺自由黨帶領下去大埔購物。
轉戰街市大掃貨
林D9噚日一拖三，叫埋三位副局長譚志源、許曉暉同陳維安齊齊出巡，高官購買力同官階成正比，林D9贏晒，去到邊都會自動扲荷包，先用800幾蚊買蜜糖、面霜等送畀囡囡同老婆，之後去到田二少嘅G2000，用400幾蚊買恤衫、領呔，買到攰，又拉大隊去酒樓飲茶，兩圍枱埋單千幾蚊。
好戲在後頭，捨官家車搭的士轉戰街市，林D9繼續大手掃貨，先後幫襯幾個攤檔買咗近300蚊臘腸同冬菇，又用500幾蚊買咗10打毛巾、1,800蚊冷頸巾，買咁多毛巾、頸巾做乜？林D9解謎，話會轉送保良局，畀長者做新年禮物。