吽吽聲　賀年MP3

月尾踏入農曆新年，牛年正式開始，估唔到Creative竟食住呢條「牛水」，出部牛牛MP3機贈興，每次開機都會聽到吽吽聲，仲內置2GB記憶體任聽歌，如果嫌隔籬部MP4機太大部，呢部諗得過！

小喇叭黑白牛

Creative呢部ZenMooPlus外形極趣怪，用乳牛大頭做機身，機身4粒按鍵分別係牛角同牛鼻；包裝亦見心思，有件紙摺牛仔衫，雖然實際功用無乜，但拼埋一齊勁爆笑。
開機之時更要留意，會有牛仔叫聲，趣怪又可愛！ZenMooPlus本身內置有2GB記憶體，雖然無得插卡，不過計一計數都可以放到500幾首歌！功能純播歌，無特別花巧，而電腦音樂老大之一Creative出品，音質方面亦可以好放心；值得一提係機身內置有喇叭，開到最高25級音量都唔覺坼，音色好、靠得住！