08回味
當時代廣場10個紅蘋果逐一亮起之際，大家正式同2008年講拜拜。08年風起雲湧，就連飲食界都不遑多讓，潮流興回顧，08年佳餚那麼多，看看8個飲食達人有甚麼最值得回味。
記者：王震遠
攝影：譚盈傑
飲食8達人
Michael：打邊爐食住等
有少年食神之稱的Michael，最鍾意打邊爐，貪其好hea，可以食住等朋友。08年最令Michael驚喜的，是找到火鍋店東來居。「我覺得打邊爐最講氣氛，呢度坐得舒服，最記得中秋由朋友介紹我嚟呢度，真係驚為天人！裝修好，淨係睇將雲石枱已經夠，喺香港我都係第一次見到有人用雲石枱打邊爐。一般火鍋店都無小菜，呢度就有得食，仲好有水準。總之小菜、火鍋、甜品都出色。」Michael走勻全世界四處搵食，對東來居如此鍾愛，相信一定有理由。
牛魔王的牛刺身
Michael自稱牛魔王，食得多牛肉有心得，用眼已能分辨靚唔靚。Michael最鍾意呢碟生牛肉刺身，用本地牛頸脊最嫩滑嘅肉做，再放入雪櫃雪住。很多時夾牛肉，夾完總發現一碟血水，Michael最怕這樣，呢度就唔會有呢個情況。
王菀之的三秒腐皮
之前Michael同王菀之食飯，見他夾住腐皮放落湯擢三下，好奇心起就問點解，原來咁做因為腐皮俾咁熱嘅湯底冲過，受熱力會變軟，快淥三次就能保留脆口。Ivana打趣的建議，她有一首歌《一秒感動》，不如這腐皮卷改名三秒腐皮，Michael便向老闆推介，後來真的改了做三秒腐皮。呢個腐皮可以做得咁企身脆口，全因師傅將腐皮整成pizza狀後捲好嚟炸，食時蘸上泰式Suki醬，味道更佳。
東來居（22443355）
灣仔謝斐道303號王子酒店一樓
吳立星姿：小店crunchcake
常常跟不同食家四周搵食的Gigi（吳立星姿），今年四月生日時才第一次試吃crunchcake，味道還好。一星期後經友人介紹來到SpoilCafe，一試難忘。「要做好食嘅crunchcake真係好難，唔夠熱又唔得，太熱又會怕燶。呢度crunchcake嘅質感好滑，但又好挺身，完全唔覺得漏。」想不到小店也能試到這種口味，所以Gigi都經常向朋友推介，而且都沒有令他們失望，現在她身邊的靚媽朋友，為小朋友開派對時，都用上了這crunchcake了。
SpoilCafe（35895678）
灣仔日街1號順好樓A舖
袁彩雲：肚餓之際那個華堡
最近天氣不錯，吸引到Fiona（袁彩雲）跟友人到薄扶林行山做運動，一行就行到去山頂。「行完咁耐山好辛苦，而且又無食早餐。其實平時我做完運動係唔會食嘢，只係會飲杯茶。嗰一刻唔知點解特別辛苦，聞到陣香味已經忍唔住想食，喺未食之前聞到已經流口水。」可能因為當肚餓之際，遇上這個華堡，令她非常難忘。之前都有試過機場的BurgerKing，卻只覺得一般。
BurgerKing（28492275）
山頂山頂道128號凌霄閣1樓1號舖
泰山：洋人煮的香煎海鱸
「一向都想嚟呢間餐廳食飯，不過啲位好難book。」因參與電視節目拍攝，泰山終有機會到訪這間澳門的米芝蓮三星餐廳。試過香煎海鱸後，「頭頂馬上冒出一個感嘆號!」在泰山印象中，嘴刁的中國人食慣蒸魚，但西廚煮的魚多較亁身。想不到在RobuchonaGalera的法國西廚炮製下的煎魚，非常好味，讚嘆「原來洋人煮魚也可以煮出這種味道」，令他十分驚喜。
RobuchonaGalera（853-28883888）
澳門葡京路2號和4號葡京酒店第四期三樓
Jacky：低溫烤焗黃土雞
平時已很愛吃黃土雞的Jacky（余健志），為自家的cookbook影相，向徐蒝小姐借用元朗舊舖的場地。徐小姐特地為Jacky開門，還用那個最原始的焗爐，為他燒了一隻黃土雞。那份誠意已令他感動，然而食物本身也要好吃才叫人難忘。「開花盤砌成的焗爐，長時間用低溫烤焗，油脂都流晒出嚟，做到雞皮又脆又薄。」讀者想試食這黃土雞，則請移玉步到灣仔，因為元朗那邊已沒有對外經營。
鴛鴦飯店（28660868）
灣仔船街18號
劉健威：野豬肉骨茶
「成日見到有報道話邊度有野豬撞死，或者俾鐵柵卡住，其實一向已經很想試食野豬，可惜一直無機會。」就在偶爾間，遇到松記士多，原來這裏有種用野豬煮的肉骨茶，非常興奮。「比起在新加坡試過有名嘅肉骨茶，呢度嘅更加好飲，豬皮燜得好腍，好煙韌，口感好好。」自街渡已經停駛之後，谷埔村就只剩松記士多的楊先生一家人，就在今個月，他們已經吃了三頭野豬。
松記士多（61721399/26799148）
沙頭角谷埔村海旁
周中：廣東懷舊味八寶鴨
周師傅為拍電視節目而再去蓮香樓，重遇廣東名菜八寶鴨，對上一次經已是十多年前。最令周師傅感慨的是，要煮八寶鴨這道菜，起骨到釀進配料，工序很繁複，香港新一代已經很少人會做。「𠵱家好多地方都已經無得食八寶鴨，講食鴨只會去食北京填鴨，呢味廣東菜好似失傳咗咁。」在這個時勢下還有人肯捱下去，找到的地方已經很少。就是那種懷舊的味道，教周師傅回味非常。
蓮香樓（25444556）
中環威靈頓街160-164號
森美：難忘心太軟
08年最令森美難忘的食物，原來是心太軟。難忘的不只是食物的味道，還是一份緬懷的心情。「以前有個女仔，整過一份甜品畀我食，就係心太軟。當時覺得好好味，後來都已經無得再食。其實隔咗好多年都唔記得咗，後來到九龍城一間西式甜品舖，試佢嗰碟心太軟，味道竟然同當年食嘅味道一樣！」相信那種無有期望中，得到的驚喜，難怪森美會覺得特別窩心。
甜蜜居特色甜品專門店（27161489）
九龍城南角道4號地下