新年快樂！香港人經過先甜後苦嘅08年，心情忐忑迎接09年。回望08，香港實在發生咗好多荒唐嘅事，有人公然「搓ourbreast」，有人竟然將重要部位插入鐵板個窿，搞到要入醫院……仲未夠荒唐？咁將三聚氰胺加料做毒奶，令無數細路有腎石，咁冇良心嘅事都做得出，夠晒離譜啦！不過最奇嘅，可能係年頭陳冠希退出香港娛樂圈，年尾又有個陳冠A上網，可見荒唐嘅事源源不絕，09年陸續有嚟。
mailto:[email protected]
最飄忽無影--煲呔
09年都係易跌難升，下半年可能反覆牛皮，不排除繼續尋底嘅可能性。八方唔係預測來年股市，只係評估煲呔民望走勢。去年民望屢創新低，最新數據顯示佢僅僅合格得50分多啲。煲呔舊年7月出席答問大會時咁講：「對於民望嘅上落，從私人嘅虛榮心嚟睇，我覺得呢個（民望）只係浮雲。」
發表「浮雲論」後，煲呔民望好似食錯嘢咁止唔到瀉，佢亦越嚟越少公開露面，直至近期先多啲現身，09年唔會繼續玩隱身啩！保安局局長李少光民望一直高企，因包機風波急跌20個百分點，09年能否收復失地，值得留意。
最佳拍檔--陳冠希、陳冠A
長江後浪推前浪，一個陳冠希倒下，還有千千萬萬個「陳冠A」上來。去年初陳冠希同多個疑似女藝人淫照連環發放，令大家度過一個非一般農曆年，呢個淫照閃卡風暴刮足一年，最近甚至有後生仔自比陳冠希，一段段性愛片段喺網上流傳。
如果要選AV界08風雲人物，陳冠希應該贏到早前自殺身亡嘅飯島愛當選。可能受明星偶像啓發，有人有樣學樣自拍做愛片段，有關短片近日流出網上，雖然只係A貨，不過陳冠A淫片hitrate都爆晒燈。兩個表演慾旺盛嘅男人，一個打頭陣，一個攞尾彩，堪稱最佳拍檔。
最佳外語--陳克勤
08年政壇最矚目新人，非民建聯陳克勤莫屬，佢幾年前獲欽點入特首辦，一直行行企企影印幾味，舊年轉戰直選，當選後一鳴驚人，接受訪問時話要「搓ourbreast」，真正「乳」出驚人。呢段訪問片段網上熱播，全港市民笑完之後，不禁要問，呢個究竟係佢嘅錯，定係社會嘅錯？所謂母語教學，點解變成「母乳」教學？
𠵱家陳克勤做埋中大校董，佢有自知之明，已報讀英文課程，仲請咗個外籍老師幫佢惡補。佢同八方講，個外籍老師讚佢英文有進步，遲啲有機會可以畀大家睇睇佢苦學成果。
最佳道具--香蕉
08年立法會改選，新一屆議會開鑼後，最大放異彩嘅，並唔係任何一位議員或官員，而係一隻蕉！年度大事回顧、風雲生果選舉，呢隻蕉不能不提。
社民連黃毓民喺煲呔宣讀施政報告時，突然掟出一隻蕉，雖然冇掟中煲呔，但足以令市民譁然，向來只得一片口水花嘅政治辯論，加咗件道具過場頓時精采好多。煲呔提出生果金引入資產審查建議被推倒，今年起仲一律加到1,000蚊，有蕉勝無蕉，一蕉勝過千言萬語，唔頒個獎畀隻蕉又點得？呢個政治道具潮流，八方相信09年會大行其道。
最佳動作--活塞男
一塊平平無奇嘅健身板，竟然成為新聞焦點，真係多得「活塞男」帶挈。舊年8月，藍田公園發生一宗令人難以置信意外，有個姓申男子，將下體插入健身板啲窿度，尋求一時之快卻搞到「不能自拔」，結果要報警求助，由救護員連人帶板送佢入醫院先可以脫困。
活塞男壯舉震撼全港，事隔幾個月，重提此事唔少人仍然記憶猶新。佢雖然成功脫身，但未能甩難，因為康文署考慮向佢追討損失，事關塊健身板要拆除報銷，塊板價值約14,000蚊，活塞男同塊板真正係「一夜夫妻萬四蚊」。
最愛國烈士--中華鱘
北京照顧香港無微不至，連國寶都捨得送嚟香港，點知香港卻將國寶當水草，半年內有兩條中華鱘命喪海洋公園。3歲嘅中華鱘5號，俾海狼咬傷不治；10歲大嘅中華鱘7號，則因為水土不服，唔適應海水飼養而冇命。
北京先後送咗10條中華鱘畀香港，𠵱家死剩8條，國寶係慶祝香港回歸10周年禮物，肩負振興香港旅遊業重任，估唔到客死異鄉，八方同好多香港人一樣，會永遠懷念佢哋。除咗中華鱘出事，另一國寶大熊貓安安都無故咬人，香港唔通真係唔適合國寶安居樂業？
最佳科技--毒奶
中國人科技成就，08年取得重大成果。最勁嘅唔係太空人成功漫步太空，而係三聚氰胺混入牛奶煉成腎石，呢個化學作用，已經喺無數嬰孩身上得到證明。香港累計有11名兒童，疑因飲毒奶患上腎結石，專家話可能有更多個案，09年逐漸浮現。
內地追究製造毒奶企業，三鹿負責人被起訴受審，不過就算刑罰好重，都唔可以彌補飲毒奶令健康受損嘅代價。香港人糧食依賴大陸輸入，內地食品有問題，香港都不能倖免，舊年有毒奶風暴，09年希望唔會再有食品出事。
最金之綠葉--副局政助
煲呔以擴大問責制為名，招攬自己友為實，去年委任多個副局長、政治助理，呢班官場新貴年薪合共過千萬元，做問責局長陪襯品，堪稱「金之綠葉」。
成件事最荒唐嘅，係8個副局長中，竟然有5個有外國籍，出現雙重效忠問題。港府初時死撐冇問題，但幾個副局長最終都係要向民意低頭放棄外國護照。初入官場就鬧出咁大個笑話，暴露一班副局、政助嘅政治智慧水平。佢哋上任半年，暫時未見政績，包機風波、的士堵塞公路事件，卻顯示佢哋應變能力不外如是，09年納稅人要繼續出糧畀佢哋，好寃枉。
