新年到，藝術T傳來電郵，祝賀新年。現在美國方面流行用HappyHoliday一詞，不用MerryX'mas，原來係政治正確之故，相信陶傑呢位政治最不正確之人，睇完又會勞氣。一位美國女士對顧客說聖誕快樂，就畀公司炒魷魚，理由係呢位女士忽略非宗教人士嘅感受，講「聖誕快樂」可能引起非基督教/天主教人士不滿。守政治正確原則，守得咁嚴，令人懼怕。左丁山並非教徒，但自小在香港長大，與所有非教徒都在耶穌誕期間聽慣、講慣MerryChristmas，冇乜唔妥吖，如果聽別人講一句聖誕快樂，就覺得被冒犯，此人心胸大概有啲問題，但美國一啲老闆竟然如此，一定係怕畀別有用心之人乘機用任何藉口告上法庭，「勒索」一筆賠償之故。
藝術T話新年有好節目介紹，就係觀賞佢老師丁衍庸嘅書展，名叫「跨越東西．遊戲古今──丁衍庸的藝術時空」，由十二月十九日起至○九年四月五日止，在尖沙嘴香港藝術館舉行。丁衍庸喎，大名鼎鼎，作品好值錢。問藝術T：「你當年上丁先生堂，有冇攞過幾張畫呀？」藝術T話：「當年學藝都未學得切，點會諗到問老師攞畫吖。丁公一九五六年就應錢穆先生之邀，加入新亞書院籌辦藝術系，到七八年辭世，今年係丁公逝世三十周年，故此有此紀念畫展。我跟丁公上堂之時，佢已經好出名，但當年書畫唔值錢，的確係有一啲同學問佢攞幾幅畫嘅，丁公好好人嘅，對學生非常好。」
聽藝術T講，丁公作品極富現代感，作品凸現一種頑皮、玩世不恭嘅風格，似足遊戲人生。而且丁公留學東京，醉心法國野獸派畫風，畫筆橫掃東方西方，故此現在呢個畫展稱之為「跨越東西．遊戲古今」，喜歡丁公作品者，不可錯過。畫展展期甚長，三個半月有多，可以成為一個吸引外來遊客嘅觀賞節目，表現香港文化一面。香港人平日事忙，適逢十二月尾及一月尾特別多假期，到香港藝術館欣賞丁公畫展，係最佳節目之一。