平安夜聖誕節逼飽未?知驚今晚除夕就梗係留喺屋企開Party最穩陣!打牌魚蝦蟹留番農曆年玩,鬥地主鋤大弟平時仲玩唔夠咩?男女老幼一於開機有聲有畫熱熱鬧鬧打機打餐飽!動作、運動、音樂、體感、益智小遊戲通通都有好介紹,孤家寡人?都可以上網Online連線同人玩。
文:㩒釘華
攝影:梁細權
Model:Isha、Eriko、Christopher@STAGEMODELS
打鼓彈結他Jam歌過除夕
慶祝踏入09年梗係載歌載舞最熱鬧。唔使去唱K同人逼,買齊PS3《GuitarHero》套裝成班Friend可以喺屋企夾Band,有鼓有結他連個咪都係$1,899,除夕夜唱K都唔只呢個數。佳節當前,少不免要𠱁吓女,Wii嘅《太鼓之達人》連套鼓又易玩又Cutie,跟節奏打鼓就掂,妹妹咁蠢豬仲唔識玩?嚟,哥哥教你吓。
一家大細Fing賤兔
上年Wii大晒,新年Party唔使諗個個都係揸住兩個體感控制器Fing、Fing、Fing,未Fing到悶嘅,今年有賤兔最新一集《RavingRabbidsTVParty》,繼續有大量小遊戲俾最多4個人鬥足一晚,老少咸宜最啱一家大細。
而Wii近期仲有一正Game推介,《CapcomVS龍之子》,黃金俠小雙俠神勇飛鷹俠返晒嚟,背景音樂仲係令人懷念嘅動畫歌,3字頭4字頭聚埋一齊集體回憶夠過癮。而且Game內唔只玩二抽二,仲有大量小遊戲,又係可以四打鬥反應鬥耐力。
運動健將集體玩波波
啲麻甩仔真係好悶,唔係足球就籃球,不過一班Friend聚頭分兩隊玩TeamWork又係過癮嘅。今年《FIFA09》口碑首次蓋過傳統足球Game霸者「青檸」,動作夠真,無Friend得閒同你開Party都唔緊要,最勁可以上網20人連線,除夕夜集合寂寞的心喺青草地上倒數,90分鐘仲有補時,幾咁溫馨。而籃球迷就無乜選擇,《NBA2K9》啦,畫面靚到真係好似睇緊ESPN直播咁!兩隻Game都有PS3同Xbox360版、支持邊個陣營都有得玩。
動作Game可愛驚嚇任揀
最後仲有動作類,已婚人士或腳扣粗鎖鏈嘅女奴有機會苦中作樂,可愛到爆《荒失失奇兵2》,最多支援4人齊齊玩,二人世界出去睇完套戲,再返屋企同另一半玩完先瞓,老婆最贊成,女友無詐型。
單身又無朋友嘅機迷都唔使灰,一係煲PS3最近勁炒嘅RPG《白騎士物語》,可以連線組隊打怪;一係好似筆者咁,就已經決定今晚開機打《Left4Dead》($299),做喪屍沉迷喺血腥暴力嘅世界,咬咬咬!嘩哈哈!
i-Gamer(27253338