風雨飄搖的08年即將同大家講再見。近期最好睇的電視節目，應該係一年一度的「新聞大事回顧」，一齣好睇的故事需要高潮起伏，今年環球投資市場乜元素都具備，所以星俠睇得好回味。
臨近08年完結，電盈（008）表決私有化又掀起股海一陣騷動，大股東在會議前突然提高私有化作價，呢一招有趁勢作亂之嫌，目的究竟為乜？最慘都係班小股東，花車錢去私有化股東特別大會投票，結果要白行一趟，真係有被人玩的感覺，但係隻股票個價咁殘又唔捨得沽，呢種痛苦真係點寫都表達唔到。
港股市況依然淡靜，不過石油股因地緣政治緊張而炒上，日前提及的中海油（883）受油價反彈而炒上，升4.3%，收7.20元。
14RSI升至74
剛宣佈購入飛利浦銷售股份全部股權的冠捷科技（903），昨逆市升3.3%，收2.50元，買盤主要在下半場發動，一度出現見價就掃的場面，甚至沽盤那邊搭到成「球」貨都好，一樣有買盤照單全掃。
冠捷昨日成交量大增，達3850萬股，買盤大盛，短線或有機會湧上2.70元左右，但14RSI現已去到74，似乎升勢已近強弩之末，再升水位估計不多。
方星俠