，少不免要嚟個回顧加展望，但噚日睇到段新聞報道，令敏妮好想先同大家分享。
裝備自己迎接逆境
金融海嘯，金融界嘅天之驕子都要淪為失業漢，不過正如敏妮經常講，知識就是力量，有智慧有學識又肯變通，總會搵到飯食。噚日睇有線新聞，就講到喺外國有個本來做會計嘅人，原本淨係花紅都等同一般人份年薪，但海嘯殺到，佢亦要被裁，閒嚟冇事做，就去個女讀書間學校做客席講師，將自己嘅會計知識同實戰經驗，教畀下一代。
點知就係咁開咗條出路，轉型成為「人之患」。雖然薪水少一大截，但據報道，年薪仍然有幾十萬，比上不足，比下有餘啦！最重要係賺到一份尊重同滿足感。
敏妮當初畢業，點都唔肯跟其他同學一樣走去教書，費事教壞學生。最重要係家陣啲小朋友，個個都咁「精靈」，做教書一定要好高EQ，敏妮呢方面最輸蝕。不過，呢段報道就令敏妮更加相信，要好好裝備自己，咪等日後俾人淘汰，搞到三餐不繼。
講完新聞，就講吓回顧與展望。呢一年，敏妮喺工作、家庭、投資都做咗大大小小好多個決定，其中最值得喺呢度攞嚟講嘅就係，今年由月供港交所（388），轉咗月供滙控（005）。
雖然之前供落嘅港交所坐緊艇，但呢個決定起碼令到敏妮唔需要摸頂供完港交所，再睇住佢急跌咁眼寃。至於再次供番嘅滙控，雖然不斷話有供股危機，但截至08年底（希望今日捱得過、頂得住）都仲守得住70蚊樓上。
投資市場不斷重複
明年經濟大家都睇淡，但敏妮相信，投資市場都不斷重複，同人一樣，只要有實力，點都有發圍。
溫敏妮
http://wanmanli.com/blogs/