倒數年年有，今年特別想快快送走2008年，金融海嘯邊個想記住？所以商場除例牌請明星撐場，唱好香港、$1着數成為今年倒數派對主題。13個商場活動一次過Show晒畀你睇，話之你喺港島九龍定新界，希望倒數一刻，齊齊用歡笑聲迎接2009年啦。
記者：許維雅、趙志雄
攝影：譚盈傑、王文忠
港島
五星戰隊打氣
每年除夕，時代廣場都最具人氣，今年香港電台請嚟大堆歌星陪你倒數，同時揭曉「優秀流行歌手大獎」及「全國最受歡迎中文流行歌曲/歌手獎」最後5強。今年「全港倒數迎2009」焦點，係5位「09五星戰隊」成員，用寫上「好」字嘅星星紙牌同大家打氣，踏正12:00mn會大喊：「人人有工開！」口號，場面肯定壯觀，埋尾仲有2分鐘煙火效果、送過萬份禮物助興，有心捧場，記得7:00pm前入場霸靚位。
地點：銅鑼灣時代廣場露天廣場
時間：9:00pm開始（21188900）
九龍
無記總動員
無計，慣性收視，九成港人鍾意無記藝員，如果你都係無記擁躉，記得Join「奧海城全城狂歡邁向2009」，陳豪、楊怡、米雪、陳百祥等一眾無記藝員陪你唱歌玩遊戲，凡用EPS或信用卡消費滿$800（憑最多3張不同商戶之發票），即可換領入場券兩張，更有機會參加大抽獎，贏取周大福美鑽吊墜、超級市場現金券等總值十萬元獎品。
地點：奧海城2期地下主題中庭
時間：10:30pm-12:30am（23973636）
$1買電器
潮流興$1，德福廣場嘅「全城除夕大玩派」搞「日日賞$1超抵價拍賣夜」，大家可以用八達通日日賞積分競投心水產品，一律以$1作底價拍賣，10件電玩禮品當中，最吸引絕對係價值$3,000嘅AppleiPodTouch，其他如數碼相機、手提電話都係必爭之選。除拍賣會外，新城電台《新香蕉俱樂》三位主持會同鄭融、官恩娜、農夫等歌手又唱又玩，一於唱住歌過新年。
地點：德福廣場一樓中央展場
拍賣時間：6:30pm-9:00pm（27500877）
古董雪茄盒結他
圓方夠高檔！邀請表演嘉賓都要「總統級」，今晚嘅「奇人奇藝除夕倒數派對」，先有人偶奇藝表演者Christopher出場，一人同時操控四個人偶，連喬治布殊同克林頓都係座上客；再有MarkMelchior改裝古董雪茄盒變電子結他演奏。仲未夠喉？聽埋用紅酒樽製成嘅管風琴音樂，包你聽出耳油。
地點：九龍站上蓋ELEMENTS圓方
時間：8:30pm-12:00mn（27355234）
《前程錦繡》為你打氣
今晚，新世紀廣場會搞「星閃閃除夕倒數迎09」，唱家班許志安、鄭融、at17準時出場。許志安加at17，大有可能高唱一曲《前程錦繡》為大家打氣，夠晒好意頭。同場有掛起十粒閃星嘅佈景台，配合埋煙火效果，倒數一刻肯定High到飛天。
地點：旺角新世紀廣場一樓星際廳
時間：11:00pm開始（23970790）
有線主播踩落apm
電視台鍾意踩落商場做除夕直播節目，啱嘅，慳成本兼現場氣氛好，難怪有線電視第一台都搞番個「有線第一台孖你過除夕」，安排多位主播殺入apm，跟現場觀眾玩遊戲送禮物。當晚即場消費再加捐款$10以上予《香港聖公會福利協會》，即可參加「除夕狂歡即場賞」活動，有機會贏取鑽石戒指或數碼相機等獎品。
地點：觀塘apm大堂
時間：11:00pm開始（22670500）
G.E.M展歌喉
旺角地標朗豪坊當然有倒數活動，參加「除夕倒數大派對@Ozone」，有女新人王G.E.M以強勁歌聲迎新年，當場更有著名占星師Jupiter免費塔羅占卜09星座運程。為增加氣氛，商場以「奇幻王國」做主題，用美麗皇宮作佈置，吉祥物小奇王子同公主會巡遊商場，同大家影相留念。
地點：朗豪坊12及13樓Ozone
時間：8:00pm-1:00am（35202800）
新界
引擎聲中告別2008年
想度過刺激驚險除夕夜，飛車表演絕對滿足到視聽享受，東港城搞「環球飛車除夕倒數大匯演」，請美國飛車家庭表演，用引擎聲同大家迎新年，凡即日消費滿$800（最多累積兩張不同商戶即日機印發票），即可換入場券兩張，每人限換4張，換完即止。
飛車家庭成員有7歲囝囝麥斯，佢4歲大已經接受訓練，6歲開始孖住父母喺大圓鐵籠表演亡命飛車，係世界最年輕電單車特技人，麥斯仔話：「我夢想係好似爸爸一樣，成為電單車特技好手。」一張娃娃臉嘅佢喺鐵籠高速迴轉，膽識過人，難怪有「TheLittleDevil」綽號，重頭戲當然係神奇爸媽表演籠內360度高速旋轉，最高時速104公里，配合嘈到坼天嘅引擎聲，現場氣氛肯定熱烘烘，人人睇到嘩嘩聲。
地點：將軍澳東港城一樓展覽場
時間：第一場12:00nn-1:00pm，第二場10:30pm-12:15am（26287399）
街舞派對
Hip-Hop、Breakdance夠潮夠型，新元朗中心舉辦嘅「跳躍到09街舞派對」肯定啱晒年輕人，台灣街舞霸主MerryMonarc、本地跳舞達人UniDancity、謝安琪同鄭融將帶領港人跳到新一年。另外，凡下午時段消費滿$100，即可享受「1元盆菜宴」，由朝玩到晚又食又睇，爽呀。
地點：新元朗中心
時間：10:30pm-12:15am（24792208）
靚爆阿Sa現身
荃灣廣場煲㷫《大耳仔走天涯》，除夕夜大搞「迎接09奇遇記」倒數派對，除佘詩曼同林保怡外，仲有靚爆蔡卓妍、關智斌同鍾舒漫等英皇成員撐場。仲嫌唔夠精采，當晚有五個團體表演Hip-Hop同Jazz，配埋大會提供嘅趣致眼鏡同繽紛紙花炮，氣氛超Hot。
地點：荃灣廣場大堂
時間：10:00pm-12:30am（24171709）
勁舞煙火嘉年華
沙田變身大型舞會，既有Hip-Hop、拉丁、爵士等表演，又可以欣賞雜技同敲擊樂，加埋許願閣、全場任玩Playstations3電子遊戲，呢個「2008除夕倒數嘉年華」派對肯定熱鬧到震。踏入倒數一刻，有埋璀璨煙火效果，節目近乎完美，絕對係新界最大型倒數節目。
地點：沙田公園、沙田大會堂廣場及城市藝坊
時間：8:30pm-12:30am（25911340）
笑爆肚過除夕
想笑到肚痛迎09年？去大埔超級城參加「狂歡倒數迎09」啦，聽ILoveYouBoyz九唔搭八發噏風，保證大家笑到喊住走。同場有靚女陳自瑤、楊秀惠同大家玩遊戲派禮物，凡捐款$10予《香港聖公會福利協會》即可參加「除夕激Fun獎」，有機會攞埋獎品返屋企，盞鬼！
地點：大埔超級城C區美食坊
時間：10:30pm-12:15am（26656090）
歌后勁歌熱舞
喜歡實力派歌手嘅爸爸媽媽們，青衣城係最佳選擇，貴為多位歌星唱歌老師嘅陳潔靈，將會喺「迎2009年倒數在葵青萬人勁歌熱舞晚會」中大展歌喉。今晚，大家可以喺青衣海濱公園睇熱舞聽勁歌，有獎遊戲同大派新年禮物呢啲指定動作梗唔少得，一家人開開心心過新年，盡享天倫樂咯喂。
地點：青衣海濱公園（青衣城段對出）
時間：7:30pm-12:30am（21867284）
冧女小生出場
追星一族記得湧入上水，上水廣場搞「大中華群星閃爍迎09」，靚仔郭品超加無綫冧女小生林峯呢個組合，肯定未出場已經嗌破小妹妹喉嚨，其他嘉賓仲有孫耀威、楊思琦陪你倒數。凡於商場消費即可參加「除夕夜每小時瘋狂大獎賞」，又或者可用$1購買總值$500嘅除夕禮品。
地點：上水廣場二樓中庭舞台
小生出場時間：10:00pm-12:15am（26729225）
換領獎品：上水廣場二樓禮品換領站