本欄來到終結篇，小弟早計劃在今天大除夕預測紅軍為今屆英超冠軍，但碰剛發生英國足球壇今年最怪誕事情，形象健康、隊長典範嘅謝拉特也蒲吧涉傷人被捕，世事難料，引證今年世界之詭異；但做人幾時都要識處變不驚，阿仙奴唔掂，一於撐硬紅軍，輸贏明年5月揭盅。
足球壇近年潮興打整體戰，個人魅力相對減低，西班牙今夏可用沙維拍恩尼斯達打「雙控中」，又有無敵工兵辛拿及沙比阿朗素任防中；兵多將勇，奪歐國盃正路非常，豈非一人球隊如C朗之葡軍可比，亦顯示球壇力量繼續不重個人重整體發揮。
領袖魅力無人能及
但回看紅軍，你又會發覺謝拉特無人能及、魅力驚人。紅軍嘅西班牙主帥賓尼廸斯前一兩年，也擬棄用謝拉特，以同胞沙比阿朗素為重心；但級數、功能有別，謝老四在極體力化的英超戰場，多年來顯示步大力雄，射門觸覺敏銳，後上直插對方心臟一招更見耍家；到現今28歲已打滾英超10年，這招仍可在「出事」前對紐記的賽事看到，大家認為他那12萬鎊周薪，對比15萬鎊的另一同類型中場林柏特，邊個更抵用？
貼紅軍，只因眾將步入大熟之年，只要費托傷癒，只要謝拉特擺脫官非，只要他們將火線放在聯賽非歐聯；相信紅軍迷大有機會看到他們等了19年的頂級聯賽獎盃。
近期不少堪輿學家都預測明年香港繼續冇運行，股票只能短炒不宜長揸，仲話𠵱家唔係牛市第1期。命運在自己手，信則有不信則無；做人最忌坐以待斃，每個人都必要學習投資理財，不要懼怕，只怕做盲毛。世情詭異，充斥虛偽，最重要懂得逆境自強，誰無受過挫折，謝拉特將會在明年證明他是近代英國足球壇最舉足輕重的風雲人物。預祝波友新年快樂，內心富足！（8之8完）
文：蘋果波神