香港電台舉行08風雲人物選舉，由聽眾網上投票，結果舉起雪山獅子旗成名嘅陳巧文上榜，僅次於美國前第一夫人希拉莉同共和黨副總統候選人佩琳，成為風雲女士第三名。
陳巧文噚日話對結果感到意外，佢認為舉旗冇乜大不了，「搞出好多風雨，風雲就冇乜。」至於佢09年願望，就係希望政府尊重港人言論自由，香港早日有民主。
至於今年頻頻炮轟政府嘅王永平，就話自己其實亦有批評立法會議員，來年佢會繼續喺大學教書同寫文，最希望加稿費同政府施政有進步。平叔又話，自己最欣賞嘅08年金句，係「問責分手」。港台選出陳巧文做風雲女士，可能有好多人睇唔順眼，八方祝港台來年好運。