賭王何鴻燊一年前公開激讚三房女兒超雲和超蓮夠索，四姨太梁安琪長女超盈則麻麻，18歲的超盈誓言減肥，一減就暴瘦20磅。前日凌晨她穿大露背裝夜蒲蘭桂坊，更凸顯瘦骨嶙峋的身形。四姨太心痛女兒每日只吃一餐，直言：「佢瘦到離譜，減肥都唔使減到咁瘦㗎！」
何家淑女靚女多，去年聖誕賭王何鴻燊曾公開品評一眾千金，盛讚二姨太藍瓊纓和三姨太陳婉珍的女兒超瓊、超儀、超雲和超蓮個個靚，四姨太梁安琪的細女超欣更靚到不得了，惟獨長女超盈麻麻。賭王強調講得公道，超盈為剝老竇棚牙，誓言：「我會瘦！我會食減肥餐單，減到滿意為止，減到唔再麻麻！」
今年初超盈返英國繼續學業，的起心肝實踐減肥誓言，激瘦近20磅。近日她趁聖誕佳節回港，從前的一身babyfat消失得無影無蹤，整個人勁瘦一大個圈，雖然神色略為憔悴，但她依然活躍，聖誕節期間日日蒲足幾場。
雙頰凹陷背骨勁凸
前日凌晨，超盈穿着大露背連身裙，佩戴小皇冠髮飾，偕同一名穿低胸裝的女伴夜蒲蘭桂坊。雖然天氣微冷，但暴瘦的超盈只手挽外套，僅穿性感露背裝，露出黑色Bra帶，非常顯眼。現場見她肩骨及背骨勁凸，雙頰凹陷，偕女伴漫步去中環夜店Dragoni存放外套，之後二人挽手走進蘭桂坊的人叢中，繼續搵下場節目。
早前超盈曾花數萬元幫襯美容院減肥，加上她聲稱患氣管炎，病足兩個月致體重急降。所謂瘦在女兒身，痛在媽咪心，超盈暴瘦情況持續，四姨太當然緊張，昨日記者致電四姨太時，她便踢爆女兒不肯進食，她說：「佢唔食嘢都冇計㗎，佢瘦到離譜。」
「佢𠵱家仲屙緊呀」
問四姨太是否擔心女兒激瘦影響健康？她無奈地說：「佢太瘦啦，減到過份，減肥都唔使減到咁瘦㗎，佢𠵱家仲屙緊呀。佢刻意搞到咁瘦，個個都想瘦，邊個唔想減肥吖？我都要減肥啦，今日我都係飲過一杯咖啡咋。」四姨太直認超盈食得少，她說：「佢肯食先得㗎，我見佢每日食一餐咋。」
採訪、攝影：娛樂突發組、李全