金融海嘯搞到全世界都窮晒，唔少人連份工都冇埋，喺生活逼人嘅環境下，罪案自然增加。就算係堂堂花旗大國，亦因為經濟低迷，今年嘅偽鈔案都升到5年高位，而且涉案者唔單止老千集團，連十零歲嘅學生哥都膽敢以身試法。
假鈔案涉6440萬美元
美國政府數字顯示，當地今年假鈔案按年急增28%，涉及銀碼6440萬美元，兩個數字都係5年最高。當地執法人員話，近年複印技術發達，令分辨真鈔假鈔難度高咗，加上今年經濟特別差，於是乎多咗老百姓以身試法，搞到偽鈔問題越嚟越猖獗。
據了解，有個年僅15歲嘅學生哥，就因為涉嫌用電腦掃描器複印銀紙，喺學校飯堂買薄餅而被補，亦有駕駛者涉嫌用假鈔畀油錢，甚至當真銀紙存入銀行，雖然手法不盡相同，但確實反映喺經濟不景下，社會道德觀念差咗。