民主黨同前綫合併，卿姐當選副主席，有卿姐嘅白鴿黨，真係唔同咗。李華明話以前黨紀廢弛，黨員開會遲到早退缺席係常態，卿姐睇唔過眼，嚴打唔守規矩分子，甚至質問點解遲到，好有兼任黨鞭潛質。八方聽聞黨主席仁哥都揸正嚟做，下月初新領導層集思會，講明要準時出席，否則後果自負。
多咗人關注官商勾結
白鴿黨喺新一年有望整頓黨紀，該黨早前就市民09年願望做電話調查，訪問500幾名市民，近四成人希望家宅平安身體健康，有近半市民認為政府過去一年一味照顧大商家、大財團，官商勾結忽視全港市民利益。
民主黨去年進行同樣民調，當時只有三成幾人認為官商勾結，今年多咗逾十個百分點嘅受訪者認為政府偏袒商界，李華明指官商勾結形象深入民心，相信政府好難洗底。調查又發現有六成人認為經濟最快要到下半年先有起色，甚至成年都冇轉機。李華明話，今次調查多咗人希望身體健康，反映經濟差令港人反璞歸真，自求多福。佢個人就希望09年唔好再有禽流感，三聚氰胺毒奶絕迹，市民食得安心。