「事主今次好好彩，咁啱有救護車在場，可以喺黃金5分鐘內救番條命。」昨日以妙手仁心救活心臟病發工人的好醫生梁時勁，對救人一事謙稱只是盡了本份；不過目擊整個救人經過的麵包師傅則直言：「咁好嘅醫生一定要表揚喇！」其實梁醫生在區內執業不足五年，但已薄有名聲，以「睇一次就藥到病除」獲街坊稱讚。
細心問症用藥準確
年約35歲的梁醫生，十年前才由中文大學醫學院畢業，取得內外全科醫學士資格，主攻家庭醫學，他昨日在其私家診所接受訪問時，對救人一事不敢邀功。他自言畢業後曾在政府醫院任職，頭六年先後在聯合、瑪麗及仁濟等公立醫院任職吸取經驗，至四年前到海怡半島開設私家診所，他亦活躍地區事務，擔任鴨脷洲聖伯多祿天主教小學的醫學顧問。
有街坊讚揚梁醫生看症用心，病人無論老幼都細心問症，而且用藥準確。本港最受歡迎親子網站「親子王國」上，亦有市民留言稱讚；網民「星星沙」留言稱：「小兒由梁醫生打預防針，他好好心機及手勢，打完都唔知。」另一網民「nancytse」則指：「老公生蛇睇梁時勁一次ok，大伯感冒睇佢都話唔錯。」本報記者