禽流感襲港，香港冇活雞賣21日，噚日終於恢復活雞供應；餓活雞多日嘅市民搶購，自由黨同民主黨搶閘鬥派免費雞，派足1,500隻。
自由黨噚日由方剛同張宇人帶隊，去到青衣同葵涌派雞，方剛指今次派嘅係本地名牌嘉美雞，出名皮薄肉嫩。張宇人更話嘉美雞平時喺街市賣過百蚊一隻，年過65歲長者，只要之前攞到換雞券就有免費雞，一連兩日喺葵涌、將軍澳同沙田派近1,000隻。
免費超齡雞派街坊
呢個世界冇免費午餐，咁大隻肥雞隨街派，當然有內情。張宇人好老實，話呢批免費雞有成兩、三斤重，都算係超齡雞。事關之前政府禁售活雞，雞場有批雞養得「肥啲、大隻啲」，推出市面未必好賣得，所以雞場老闆做個順水人情派街坊，既然啲雞賣唔出都係人道毀滅，不如送畀長者，等佢哋開開心心有雞過年。
自由黨係富貴黨，人哋出雞，佢哋出埋冷頸巾同蝦子麵，都係由區議員搵有心人贊助，行動不便長者，有專人送到上門㖭。
吸引長者凌晨排隊
民主黨都有雞派，主席何俊仁拍住區議員黃麗嫦，今日喺屯門良景邨街市向60歲以上長者派500隻雞，可能係創黨以來最大手筆益街坊活動。據講呢批雞都係雞場老闆贊助，應該係同自由黨啲雞同一來源。黃麗嫦同八方講，早幾日喺議員辦事處派發換雞券時，凌晨3點幾鐘已有長者摸黑排隊，可見免費雞吸引力幾犀利。民主黨冇自由黨咁富貴，今次齋送雞冇其他禮物，不過黃麗嫦透露，遲啲可能會派美食券畀長者，由於良景邨多數係基層長者，平日伙食都好慳，派美食券請佢哋食碗麵、食個包，係最好新年禮物。
兩大黨派免費雞，點食法最好呢？可惜自由黨唔送埋豉油，冇得整豉油雞。張宇人就話用嚟煲湯最好，黃麗嫦則話隻雞皮薄肉瘦，佢曾經試食，認為蒸煮一流，豉油都慳番唔使落呀！政黨搞地區工作競爭激烈，要出盡法寶冧街坊，博第日有選票回報，呢隻免費雞，無論係豉油煮、白切定油炸，八方相信都一陣政治味，大家食時嗒真啲。
mailto:[email protected]