金融海嘯搞到全球經濟衰退，紐約華爾街金融業今年更加係愁雲密佈，不過紐約嘅旅遊業反而一片好景，仲成為美國最佳消閒城市，唔通海嘯災區對遊客真係咁有吸引力？
紐約市市長彭博話，該市今年旅客人數創新高，總共接待咗4700萬遊客，消費金額高達300億美金（2340億港銀）。截至11月，旅遊娛樂業為紐約市庫房進賬19.4億美金（151.3億港銀），幫補華爾街金融海嘯引致嘅大筆經濟損失。
980萬遊客湧到紐約
據紐約旅遊組織NYC&Co調查顯示，紐約市今年海外旅客人數比舊年急升100萬，總數增至980萬，仲首度揮低奧蘭多、佛羅里達同拉斯維加斯，成為美國最佳消閒城市。雖然經濟下滑，令當地酒店入住率比舊年跌1.5百分點，只係得85%水平，但相對國內其他城市嘅酒店平均入住率，仍高出20個百分點。