英超年尾快車期喺今夜侯城對維拉後結束，之後會打足總盃，英國傳媒嘅焦點將會集中在1月轉會市場嘅炒作新聞。好奇怪，總覺得英國人唔知係咪天生喜做生意，有理冇理，求其買番嚟先算，肥了邊個，大家心中有數。
辛達告魯斯反骨
射手永遠係球會買人嘅首要選擇，但我以為有3類前鋒要不得，第1類是反骨型──代表人物：辛達告魯斯，季初有貝碧托夫扭計得逞，但3,000多萬鎊從熱刺去到曼聯，暫時作用有幾多，大家判斷；如今，有以往效力拜仁時，被嘲為「藥煲」嘅巴拉圭射手辛達告魯斯有離心。此子上屆平價投布力般踢出彩虹，但今屆一直想隨舊波士曉士去水魚球會曼城，表現大跌watt；聯賽只上陣13次入3球，已大半個月稱傷未有上陣，快車期大家打生打死，剛見佢坐喺場邊奸笑，這類人好波也沒用，心態要不得，去到曼城，亦無法在短期內起到作用。
第2類是老弱拼殘型──代表人物：奧雲仔，十幾歲成名，憑天生速度叱吒球壇，如今29歲滿身傷痕，值得向他致敬；但要他再好似禾確特快放發難，恐無能為力，最多只能做一位禁區殺手；紐記如今想早放走套現，只等水魚上釣，車路士放風買前鋒，唔係佢啩？
第3類是高大衰型──代表人物：賓特拿，小弟真的對賓特拿嘅盤球技術「嘆為觀止」，作為正箭頭，入球量亦嚴重偏低，咪以為佢有青春有身型兼係丹麥首席前鋒就好巴閉，資質所限，球迷只係對佢穿唔同顏色嘅波砵有印象，進度未足以喺阿仙奴立足；不如借走佢跟前輩米高勞特立，去莫斯科斯巴達捱吓苦，或有另一番天地。（8之7）
文：蘋果波神