假期氣氛濃厚，市況偏淡，下跌正股超過470隻，大市走勢先高後低，午後一度下跌139點，收市跌92點，雖然上海綜指連跌7日，再跌近1%，但中資股較硬淨，H指僅微跌11點。
過埋今日，令人人唔開心嘅2008年終於過去，新的一年，都唔敢有太大想頭，但願全球經濟快啲恢復元氣，重新過番啲好日子。
中國林大（910）早前已發咗盈警，但中期盤數唔算太差，可以咁講，係由「絢爛歸於平淡」，所以在噚日嘅淡市中，仍然守得好穩，睇盤路，更似有大盤在密密收集。
09年度（3月年結）的上半年，林大營業額7.18億元，升12%，獲利1.879億元，大減85.2%，每股盈利3.39仙，減86.3%。盈利大減，主要係上年度同期有生物資產公平值變動收益10.36億元，今個年度，集團並無完成林場之新收購，因此並無錄得有關收益。不計特殊項目，盈利實際減少35.8%。
期內，集團錄得投資港股之未實現虧損淨額約3500萬元，以及年初雪災後清理災場及重建區內林場通路之開支約3400萬元，若無天災影響，實際盈利可逾2.2億元。
PE低折讓大
林大已完成收購神宇新能源集團，因而成功收購140萬畝林地及90萬畝小桐子種植，在中期結算日，公司擁有之林地使用權總面積達770萬畝，擁有之總木材資源已增至約2200萬立方米，日後木材產品之生產能力將相應提升。
上半年度，公司銷售不同木材品位之加工木材產品19.8萬立方米，平均單價2716元；立木43.8萬立方米，單價283元；紙桑樹產品3.56萬公噸，單價1538元；木漿用木材1500公噸，單價708元。
09年度全年，估計林大盈利約4億元，每股盈利7.2仙，林大昨收0.325元，預測PE4.5倍。
林大轉型生態造林業務，盈利由數千萬元急速上升到以10億元計，令人目眩，今個年度，不再有生物資產公平值入賬，盈利回復正常，但PE僅4倍多，物有所值；中期結算日，林大每股資產淨值1.39元，股價更大折讓76%。
郭兆誠