如來神掌現英超！今次扮演龍劍飛嘅，係史篤城前鋒富拿，佢周日作客1:2負韋斯咸場波，出手掌摑隊長格芬被罰出場。富拿呢次「出招」傷到自己友，兼連累球隊輸波，好可能重罰2萬鎊（約23萬港元）㖭，真係好傷！
話說比賽去到52分鐘，史篤城被韋斯咸追和1:1，大家步向中圈開波。其間，隊長格芬埋怨富拿唔嘜人以致失波，富拿亦不示弱當場駁嘴；兩人越行越埋之際，隊友格連韋倫上前隔開雙方。突然間，富拿右手繞過韋倫，摑咗格芬一巴，震驚英國球壇！
事發之後，球證鍾斯同格芬講咗幾句後，決定出紅牌趕富拿出場，格芬仲舉起拇指示意對方快啲「躝」去更衣室啦！史篤城領隊普利斯賽後亦表示絕不容忍呢種行為：「佢哋兩個聖誕開P都仲好哋哋，大聲講粗口大聲笑，我識得點處理！」
掌摑隊長格芬被逐
預計，富拿將被罰兩周周薪，約2萬鎊，呢一鋪都咪話唔肉赤。不過，29歲嘅富拿都係時候收吓火，今季打過22場波，就儲到7黃1紅。嘩！如果次次都罰錢，富拿真係多多錢都唔夠罰啊！
講到英超球員同隊友場上打交事件，我求大俠諗起95年布力般流浪嘅拿索斯大戰比堤，以及05年紐卡素保耶大戰戴亞。唔通英超球星特別鍾意公開狗咬狗骨？醜死怪啦！