手袋絕對是女人荷包的毒藥，餐餐啃麵包碌爆卡為買名牌袋時有所聞。最可恨是出新款快過出糧，一個袋上落至少幾千至幾萬，身家往往就咁奉獻了。臨近新年又想再買個新袋去Party肯定背上敗家之名，萬料不及搵到一招手袋出租，日租一百幾十就可以日日轉新Look，從來都無諗過，港女可以變慳妹！
記者：葉雪芯
攝影：楊錦文
Model：Algie@puremodel
Makeup&Hair：Xavier
二百有找 租clutch去party
租車、租樓、租碟，就嚟連男朋友都有得租的年代，最新一招正中女士下懷的是租手袋。對於不少香港人可能仍然是陌生，但其實租賃名牌手袋在外國早已經流行多年。提供出租手袋服務的ICONLady負責人Jason睇來很明白女人的心理：「無論手袋有幾靚，一個月之後就會想買新。」他說，尤其金融海嘯之後，大家的荷包都縮水，買袋的人的確少了很多，租手袋反而殺出了新血路。臨近新年，是去Party的好時候，要出去威，無番個clutch點出得大場面？估唔到連clutch都有得租，而且勁貼心，一百幾十租兩日一夜，但要先付原價作為按金，Jason說：「clutch的實用性不大，最多只是用得着一次半次，不需要花大量金錢就可以搵到最適合的手袋出席不同的場合，所以租賃情況都幾受歡迎。」百五蚊有找租一次，去十個八個Ball都無問題！除了clutch，Jason說其他手袋會以月租形式，當中以miumiu、Gucci的大袋比較受歡迎。
兼做寄賣易回本
平日有去開乜乜站出二手貨的姊妹都知道，即場交易，只得兩種結果，收或不收，而且仲有一套規矩，某些品牌如MarcJacobs、KateSpade、Coach等一概不收。但若然各位真金白銀花過錢買了上述的名牌手袋，家陣一樣有散貨場，皆因ICONLady做埋寄賣服務，順手加入環保行列，仲幫手做埋consultant，建議定價，分分鐘幫手回本，又或者在此找到外國專有的特別版貨色，以後我再買手袋都唔會有罪惡感。
ICONLady（21161678）
銅鑼灣渣甸街25號金利隆中心三樓