下年恒指走勢、煲呔民望冇人講得準，但東亞運動會就肯定喺12月舉行，但籌備至今諸事不順，主力搞手霍老爺搵埋未來新抱嚟獻技嘅籌款跳水表演都反應麻麻。最搞笑係小霍噚日話，賣唔晒嘅飛咪派畀市民囉，咁仲有人去買飛嘅？連民政事務局常秘尤曾家麗都唔畀面，對於小霍想搞18區火炬傳送，肥尤話不如喺個運動場裏面傳吓就算，一頭無情冷水兜頭淋。
東亞運動會經費要成2.4億，政府約承擔一半，剩番嘅就要靠商業贊助同門票收益等。尤曾家麗噚日同八方講，基本上已搵到足夠贊助商拍心口，但佢又補充一句，話𠵱家呢個時勢，雷曼兄弟都執笠，真係乜都有可能發生。
搵未來新抱幫手籌旗
其實東亞運籌委會主席霍震霆已經用盡方法增加資金來源，除咗拍譚校長同李克勤膊頭，要佢哋將明年2月嘅左麟右李演唱會部份門票收益撥歸運動會外，小霍仲搵咗疑似未來新抱郭晶晶，帶埋國家跳水隊師弟妹，包括吳敏霞、火亮、王鑫咁，加埋花樣游泳隊十幾人，下月8號再來港獻技，順便為東亞運籌旗。
𠵱家咁嘅環境，一蚊一條魚一隻蟹就話去搶啫，跳水表演門票分500、350、150、100蚊四種，咁鬼貴，唔怪得噚日門票開售，九龍公園售票處冷清清咁啦。
門票賣唔出或免費派
香港電台引述小霍回應話，相信巿民經過奧運同聖誕假期狂歡後需要時間調整，仲話如果最後賣唔晒飛，會考慮免費派畀公眾。唔知小霍係咪都係聖誕過後需要時間調整，佢咁講法，買咗飛嘅市民呻笨之餘，今日仲有人去買飛嘅？主辦單位嘅公關話，全日門票賣出過千張，即係賣咗三分之二，最平嘅100蚊飛最受歡迎，今日四種票價嘅飛仍然有得賣。至於賣剩嘅飛點算，公關話過埋今日先決定。
小霍當然唔想搞衰東亞運，佢日前炮轟港府支持力度唔夠，希望好似奧運咁，喺18區傳送火炬，吸引多啲人去睇比賽。但尤曾家麗話，火炬傳送會搞，但就未必傳晒18區，可能喺主場內傳吓就算。小霍對體育嗰團火，唔知有冇被呢兜冷水淋熄呢？
mailto:[email protected]
