聖誕過後，新年又到，好多人外遊未返，市場仲充滿假期氣氛，靜到暈，全日成交唔夠220億元。期指結算前夕，市況低開高收，假期外圍冇大事發生，美股亦升咗兩日，但港股一早就開低成200幾點，無形之手神乎其技，唔到你唔服。
恒指收市企穩14000點大關之上，升144點，H指就升112點。今次由反彈高位15781回落，在50日線（13989）水平獲支持，係再跌過，抑或係調整，要看短期能否重上20日線（14585）同10日線（14837）（下跌中）之上，個人看法較為樂觀，今日期指結算後，走勢料會有突破。
上升正股超過500隻，相信今明兩日會有更多粉飾櫥窗活動，不過，其中有唔少係跌到殘同跌過龍嘅實力股，只要上番較為合理嘅水平，就已經有排升。
月初推介中國建築（3311），當時股價1.06元，噚日高收1.35元，較月初升27%。去年10月底，中國建築高價4.375元，一年後跌到0.60元，𠵱家股價只係反彈一倍多啲，以佢食到正中央大搞基建呢個大浪，升多幾成，或再翻一番，都唔算太過。
為未來接單作好準備
中國建築形成雙底回升，在1.26元的頸線水平整固兩個多禮拜，噚日再破位而上，動力亦明顯轉強，照度上去，短期目標指向1.75元。
公司大股東雖然係中國海外集團，但冇靠祖蔭，過往生意反而集中在港澳同海外地區，今次中央全力推行基建投資，公司已話到明要分一大杯羮，並已開始增聘人手，為未來接單作準備。
中國建築一年生意逾百億元，目前手頭工程有87項，總值近400億元，08年（12月年結）上半年獲利2.57億元，估計全年5.5億元，每股盈利23.4仙，以目標1.75元計，PE亦只係7.5倍，仲好吸引。09年盈利再進，股價有力重上2元至2.50元。
香港建設（190）調整完成，升勢再起，高收0.68元，升4仙，突破大圓底頂部阻力後嘅後抽已完成，量度上升目標係0.99元，中線可重上1.30元的徘徊區水平。港建目前手頭上有現金逾40億元，每股賬面資產淨值1.70元，股價低得不合理。
郭兆誠