今屆立法會退下火線嘅民主黨創黨主席馬丁，噚日出席黨友辦事處開幕禮時，不忘同八方分享吓佢嘅「退休」生活。本身係大狀嘅馬丁話，雖然已經離開立法會，但仲未離開法庭，所以成日都要打官司；至於啱啱過去嘅聖誕節，馬丁主要係去做彌撒，但就咁啱得咁蹺，遇正近排民望插水嘅煲呔，仲「咁啱坐喺佢後面嗰行」。
多啲同學生傾偈
馬丁話，雙方碰面時都有互祝聖誕快樂，至於有冇順道祝福煲呔民望反彈，馬丁就笑住話：「佢𠵱家都成日好勤力祈禱㗎嘞。」馬丁認為，政府𠵱家施政唔多掂，主要係因為聽意見時聽得唔夠全面。雖然馬丁忙於打官司，但佢都話想搵時間去學校，同學生講吓民主、法治同人權，其實馬丁做立法會議員咁多年，每次學校邀請佢去演講，佢都永冇托手踭。
民主黨主席仁哥就話，一班落選黨員嚟緊亦會上堂，向黨校校長楊森同狄志遠學習點樣搞環保回收同社企，實行以戰養戰，一邊做義工幫人，一邊培養地區實力，部署下屆再接再厲。