呢個聖誕假期，城中名人忙到暈，去完聖誕party，噚晚又要趕兩場，因為前高官施祖祥同上市公司百營環球主席施展望同日辦喜事，施公嫁女，老施就娶新抱，噚晚同時喺會展擺酒，果然係好事成雙。
施祖祥官至憲制事務司，回歸前急流勇退，留下「鐵的衙門、流水的官」名言。施公嫁女，筵開24席，好多政要到場賀佢，煲呔夫婦、陳太兩公婆、王永平、李國能都有到，教育局局長孫公更係上賓，因為當年施公結婚，據講係由孫公做證婚人，施祖祥嫁女，孫公豈可不到？
施公辦喜事謝絕傳媒採訪，新娘子施敏珊Karen更唔肯企定定畀記者影相，反而派咗張履歷畀記者，介紹新娘子係臨床心理學家，畢業於美國ClaremontMcKennaCollege，專長治療自閉症同情緒病患，𠵱家獨立執業。其實Karen不時見報曝光，以專家身份解釋自閉症，喺大喜日子着起婚紗卻忽然怕羞，真係趣致。新郎哥黃志明Tony都係臨床心理學家，據講喺那打素醫院工作。
千人到賀麻雀聲勁
另一個施家喺隔籬廳擺酒，施展望近期傑作係以3.8億元，摸頂購入山頂天比高C屋（即係普樂道16號），市場嘩然。呢位老施咁富貴，娶新抱排場一味夠豪，擺足70圍，成千人嚟飲。由於賓客眾多，麻雀都要開50枱，劈劈啪啪聲勢勁過竹館，八方都大開眼界。
施展望係福建同鄉會榮譽顧問，喺本地福建幫中地位數一數二，所以噚晚都有好多權貴捧場。局長有林瑞麟，前高官有何志平、黃星華同藍爺，民建聯蔡菜子係福建幫一分子，原來同老施係結拜姊弟，契弟娶新抱，佢梗係要到賀啦。
蔡菜子喜酒飲得多，有人講笑問幾時輪到佢，蔡菜子身經百戰被人問得多，話遲早有機會，仲話佢派帖嘅話，大家記住早啲到！
mailto:[email protected]
