孫柏文相信，喺《金手指》差唔多3年嘅歷史中，最多人剪落嚟貼牆嘅文章，就係一篇題為「要同客劈酒……點算？」關於如何對付酒後不適嘅文。
文中，我講過解決酒後不適嘅方法，就係好似油公司對付啲舊油井嘅waterinjectionmethod，要將1公升暖水灌肚，兩分鐘之後扣喉，將殘餘物同從血液中倒流入胃嘅酒精一齊嘔出，之後再飲暖水。背後嘅科學邏輯非常簡單──中毒就要排毒。
暖水灌肚助排毒
不過，呢個聖誕佳節，我就從兩個唔同嘅來源，聽到一個科學邏輯上同以上背馳嘅解決酒後不適方法。《華爾街日報》就叫「hairofthedog」，而我個auntie就叫「回魂酒」，即係劈酒後第二日感覺唔舒服時，再劈多個shot。《華爾街日報》就推介一款叫「Ambassador'sMorningLift」嘅雞尾酒，而auntie就話一shotX.O.得。
大家可能問：「火燭仲淋電油上去？」問得好！不過我就喺度諗，以上講過嘅兩個方法，其實就係世界各國政府，對付金融海嘯嘅大方向。
飲「信貸回魂酒」
面對着因為之前啲人過份借貸，帶嚟今日嘅辛苦，一係用我建議嘅方法，盡快排毒，公司應執即執，工人應轉行就盡快迫自己轉行。一係就飲「信貸回魂酒」。
不過《華爾街日報》警告，飲得「回魂酒」多，好容易會酗酒。
孫柏文
http://phatdat.blogspot.com