今天想獻醜寫一點籃球。聖誕新年假期，除了英超外，早上嘅NBA直播相信是體育迷主打娛樂，近年跟同事們間幾位NBA專家學嘢，自己亦留意多了，獲益不淺。隊際運動嘅營運管理各有不同，有人豪花，有人節儉，各師各法，你可以扮車仔曼城喪玩幾年，又可以似阿仙奴死抱量入為出為原則。但始終能長玩長有最王道，富貴如車仔班主阿巴莫域治竟也亁塘，所以值得向費格遜同雲格致敬，但NBA裏有位更值得體育迷尊重嘅教練，爵士嘅千勝主帥史龍(JerrySloan)。
論球會價值，座落於猶他州嘅爵士隊絕不能像紐約人瘋狂使錢；所以能做到第21個年頭，教同一隊波，但一次NBA總冠軍也未攞過，仍能屹立不倒，喺現今人情紙咁薄嘅商業社會，難有幾位教頭可頂得住。史龍在90年代擁紅極一時嘅孖寶史托頓及馬龍替他打天下，硬撼當時波神米高佐敦，可惜兩度在總決賽失手；10年後今天，人面全非，但爵士仍是西岸舉足輕重的爭霸分子，史龍冇得頂！
超殘陣爵士雖敗猶榮
籃球唔同足球，場上只得5位正選，位位要舉足輕重，但爵士近期在頻密嘅聖誕賽期，竟然有3位得分主將缺陣，加上指揮官廸朗威廉士在傷患陰影下，只能發揮6、7成狀態；但隊內新人表現出色，尤其昨晨鬥至雙加時輸畀火箭一役，同意當時評述員所講，火箭球迷應該在完場後向超殘陣嘅爵士致敬。
懂睇體育比賽近30年，勝負喺個人眼中多是過眼雲煙，能夠有幸睇到激動人心嘅比賽，才可說此生無憾。以弱勝強，以柔制剛，得來的成果更彌足珍貴，還望雲格同阿仙奴剛從美職請過來嘅CEO加斯廸斯，一月轉會窗重開，緊守謹慎理財，不要因傷兵多而添無謂兵。給你一個C朗又如何，根本係格格不入！
（8之6）
蘋果波神