聖誕假期前，在會所吃午飯，剛好坐在兩位身穿行政人員套裝嘅女士隔籬枱。香港啲女士做事作風強悍明朗，比男士有過之而無不及，好多時佢哋與男士一起吃飯，會保持禮貌，十分正經，但試過幾次在會所坐在女士鄰座，佢哋嘅真誠面貌出現，原來好鬼多嘢講嘅，甚至近乎嘮嘈㖭。記得某次隔籬大枱坐了十位中年女士，大聲講大聲笑，好似係有一位自加拿大回流，與女同學重逢，紀念中學畢業二十五年；佢哋嗰鋪嘈法，整個會所人士為之側目。又有一次見到六至八位女士在座，枱上有紅酒、白酒、香檳共三樽，飲得開心，大講湊仔湊女經，不知幾高興。香港太太團是很幸福的。
今次坐在兩位女行政人員隔籬，又聽到佢哋大聲講湊仔經，一位話：「今晚大仔有得飲，十點幾先至返屋企，唔使理佢住。」咦，望真吓，呢位女士似四十幾歲啫，乜已有一個大仔可以自己一個人出街參加婚宴？聽吓聽吓（事實上想聽唔到都幾難），先知道女士口中之大仔，乃老公仔也，細仔先至係讀緊中學嘅兒子。另一位女士話：「香港冇男人㗎嘞，香港係只有boy，冇man嘅城市，可以稱為man嘅，都係我哋老前輩、世叔伯輩。」女士Ａ講：「大仔晚晚沖完涼，浴雨似足天女散花，滿地衫褲，奉旨係我去執拾嘅，叫賓賓去執，我都有啲難為情。」女士Ｂ答：「我嘅大仔沖完涼，浴室如騰雲駕霧，地上水花四濺，因為佢好易忘記開抽氣機與水花外流，沖完涼呢，佢就會埋位打機起碼兩小時，你話佢係唔係大唔透吖。」
左丁山聽見，幾乎想笑，但又唔敢笑。兩位女士講口中嘅大仔，似係今日不少香港二十幾歲男子嘅prototype（原型），尤其以自細俾菲傭照顧到大者為多，佢哋行為嘅特點就係出外有型有款，返到屋企就亂七八糟，一切自有菲傭跟尾執拾。結咗婚又點呢？請菲傭啦或者老婆做清道夫執手尾啦。香港女士出到中環似女強人，返到屋企湊大仔似足菲傭，湊細仔讀名校，似足補習老師，真可敬也！亦難怪好多女仔不肯拍拖，唔肯結婚。