金融海嘯之下，富豪水浸眼眉，紛紛勒緊褲頭，偏偏曼聯球星視海嘯如花灑，聖誕期間洗腳唔抹腳，個個好似大劉上身咁！
紅魔球員不嬲嗜車如命，今個冬天，基斯坦奴朗拿度（C朗）、傑斯同雲達沙，各花20萬鎊（約226萬港元）買入名車賓利，車行經紀肯定肥過豬頭嘞！曼聯球會內部人士講：「佢哋一啲都冇受金融海嘯影響，只要有新車款出，就買返屋企。」呢位仁兄透露傑斯一向係賓利迷，今次係更新車款，至於C朗近年就更加有鋪儲車癮。總之，班球員每人起碼有幾部車，有如現實版嘅《頭文字D》一樣精采！
朗尼買鑽勞送畀老婆
朗尼同高蓮首次以夫妻身份過聖誕，自然不甘寂寞，合共使咗30萬鎊互送禮物，而且好心有靈犀㖭！原來，朗尼參加世冠盃前喺屋企附近間珠寶店，用7萬鎊買咗個鑽石勞力士錶，作為老婆嘅禮物。之後，高蓮竟然去同一間舖，用8萬鎊買咗個PANERAI手錶送番畀佢。
呢對浮誇夫婦嘅友人講：「佢哋想畀個驚喜對方，估唔到去咗同一間舖，到咗交換禮物先發覺！」大家係咪覺得佢哋好浪漫呢？我求大俠覺得嘥錢就真，朗尼今個聖誕仲買咗部15萬鎊賓利，同埋白金頸鏈畀高蓮，唔通要咁重手嘅禮物，先可以表達情深義重？
從曼聯球星嘅消費心態，可見球壇財富分佈不均嘅毛病。班主、球會、球迷窮到死，球星繼續風流快活，共度時艱？睬你都儍！