09年熱捧對象，內需股肯定佔有重要一席。大半年以來，內需股跌到殘晒，PE只得三幾倍，中央大力刺激內需，效果已開始浮現，內需股首先受惠，未來股價升一兩個開，冇難度。
買內需股，投資者目標大多集中在內地的百貨及零售股身上，以批發業務為主的，反而少人留意，其實消費市場係由批發而到零售，消費轉旺，批發先飲頭啖湯，今日介紹嘅亨泰（197），就是內地批發股，內需股獲追捧，亨泰應行先一步。
亨泰在內地分銷及批發消費品，主要係從外地入口，包括飲料、食品同家庭消費品，生意好大，08年度（6月年結），營業額22.74億元，升32%；盈利2.55億元，升34%，每股盈利16.3仙，升23%，升幅較小，係受去年配售新股（配售價1.78元）所攤薄。亨泰上周三收0.59元，往績PE僅3.6倍。
去年高價配股集資逾2.5億元，對亨泰好有利，加上以每股0.505元出售所持的中國天化工（362）股權（同現時相比亦是高價），套現近2億元，令手頭上有淨現金3.4億元，有充裕財力去迎接消費復蘇期。
料有粉飾櫥窗活動
08年6月底，亨泰每股賬面資產淨值1.25元，股價大折讓逾52%，PE咁低，股價折讓咁大，在內需股中搵唔到第二隻。
受惠中央拉動內需政策，明年消費市道會逐漸轉旺，亨泰09年度業績可保持增長，估計盈利達3億元，升17.6%，每股盈利18.8仙，股價即使升至資產淨值的1.25元，預測PE亦只係6.6倍，仍然偏低。
今年10月底，亨泰最低見0.285元，上月中反彈上0.56元再調整，形成高低腳底部，近日升勢再起，在0.56元的頸線水平整固後高收，一上破100日線（0.61元），新升浪即可確認，初步上升目標0.82元。
亨泰係基金股，5大基金合共持股45%，年近歲晚，唔排除會有粉飾櫥窗活動。去年5月，亨泰股價2.20元，去年6月底配售新股價1.78元，跌到0.285元，就以反彈保守的0.382倍計，股價已可重上1元水平。
郭兆誠