今年初有位陳生因為拎部電腦去整，搞到滿城風雨，近日又有個陳生話要整電腦喇！四川地震後各方伸出援手，創新科技署前署長王錫基係「每童一電腦」計劃亞太區總裁，佢呼籲市民送XO電腦畀受地震影響學童，仲搵咗「星之子」陳易希做「XO青年大使」。去過廣西山區探訪嘅陳易希話，會研究吓部電腦嘅功能，試吓整得勁啲，再推廣出去。
陳易希中學時去過廣西助學，知道當地教育設施好簡陋，希望呢個送電腦計劃可以幫到手。陳易希啱啱完成科大第二年第一個學期課程，佢話讀書成績唔錯。王錫基退休後出錢出力推動環保同教育工作，猛講XO電腦功能齊全又有教學軟件，市民𠵱家可用3,380蚊買兩部，一部自用，一部送到四川，佢透露受金融海嘯影響，原本承諾捐贈5,000部電腦嘅公司縮沙，希望市民慷慨啲補數。