眨吓眼，風起雲湧的08年快將過去，對不少人而言，08年真係不堪回首。股市年內單邊大跌，狂跌過程中又多次出現一刻天堂、一刻地獄式上落，散戶叫苦連天！其實莫說係股票，即使其他投資工具、商品及貨幣一樣玩殘不少人，好似油價就係其一，若然有投資者在油價高企140美元時，誤信油價後市將炒上200美元而追入，家陣真係唔知點算？
油價家陣跌至40美元以下，幾時重拾升軌冇人知。坊間好多炒期油人士仲係睇好油價未來走勢，主要因石油有限，而消耗量高居不下，加上中國需要建立戰略石油儲備，如果經濟衰退在明年下半年開始扭轉，反彈速度可以好快，到時燃油需求又會上升，所以油價高位回吐後，市場人士要再炒高油價，其實不愁藉口。
內地傳出，中海油（883）自10月份起首現虧損，主因係油價年內暴跌，海上採油成本平均高達每桶65美元，但油價在10月份已失守60美元一桶，何況家陣連40美元都跌破。有內地業界人士預期，中海油或關閉部份盈利能力不高的油井，以避風險。
考驗升軌支持
中海油近期自8.06元高位持續回落，考驗由3.83元低位延伸之上升軌支持，現時約在6元水平，除非油價短期大升，否則現水平還是不宜沾手。
方星俠