公民黨張超雄同譚香文落選不能連任，休養生息幾個月，決定重整旗鼓再上路。兩人雖然都係專業人士，卻唔係大狀，順其自然淡出黨領導核心，據知兩人近日拉埋連任失敗嘅郭家麒醫生，研究大家合作可能性。
知情者話三人都認為從政條路仍然可行，日後可能會合作搞一啲地區工作，不過佢強調，呢個「嬲」字組合，絕對唔係另起爐灶，事關張超雄同譚香文，喺呢一刻都冇退黨打算，張超雄亦係公民黨執委。譚香文未能重返立法會，據知佢暫時無意重操故業做番會計，正同幾間大學接洽，為大學生開辦一啲會計課程，為人為己，爭取多啲年輕準會計師認同，日後重出江湖都多啲把握。