阿姐汪明荃雖然身為政協，不過都唔係人人畀面佢，近日為咗將八和會館申請為非牟利慈善團體，被人質疑做法唔妥鬧出風波。佢接受香港電台訪問時話，好彩會員都支持八和轉型，日前開會員大會大比數通過八和申請做非牟利慈善團體，收到呢份聖誕禮物真係好開心。
拒放寬入會資格
好多人批評港府對粵劇支援不足，阿姐話好擔心粵劇傳到佢呢一代會斷層，佢指香港缺乏排練地方，有啲粵劇、粵曲發燒友，竟然要租用康文署壁球場操曲，連個似樣啲嘅場地都冇。八方聽到都好驚奇，幾十年前就話要土法煉鋼啫，估唔到𠵱家要土法練曲。
阿姐又話，第日西九文化區會有戲曲館，粵劇界人士應該以西九為目標，𠵱家做好培育新人工作，日後有新場地時先有機會表演，否則冇接班人，起好新場館都得物無所用。坊間好多人愛唱粵曲，阿姐話業餘嘅只係唱粵曲，正宗嘅仲包括做、念、打，只係多人唱粵曲唔夠，唔訓練新人識全套唱、做、念、打，恐怕粵劇遲早失傳。
唔講唔知，阿姐話好多愛唱粵曲嘅師奶想加入做八和會員，以前入會一度寬鬆，佢卻認為應該從嚴，真正專業粵劇演員先可做會員，以維持粵劇專業水平，佢講到明唔會隨便畀人入會㗎。