莊士機構（367）手頭求其一幢物業，都高過本身市值，殘到痹，呢轉博佢爆上。莊士最新NAV2.48元，折讓講緊87%，隨手執件投資物業，好似尖嘴莊士倫敦廣場咁，總樓面11.3萬平方呎，就以每方呎6500蚊呢個極之保守嘅樓面呎價去計數，單幢物業價值7.3億銀，已經高過莊士本身市值4.8億銀。
再講，莊士透過莊中（298）發展祖國內房業務，莊士本身又拓展越南房地產，主打金磚四國地區，未來發展潛力龐大，連埋NAV增值條數計，莊士現價（0.32元）隨時得NAV1折水位。又呢期所見，近磅晒士嘅豐德麗（571），俾基金煲爆，股價一支箭升咗兩倍，亦證明超筍細價嘢，唔係冇人吼，莊士等有心人發掘。
莊士對上星期平均線三線滙合，股價兼且升穿10日線，呢鋪博佢爆單邊向上，係咁意以0.2倍P/B做目標（即係NAV折讓80%），莊士都要見0.495元，現價講緊翻半番。
宏安有point炒落後
宏安（1222）連埋最近配股攤薄效應計，最新NAV約莫0.13元，現價（2.7仙）折讓上到79%，折讓又係勁誇張嗰隻。又呢期宏安配股價2.2仙，同集團現價差無幾，承配人唔係話有好多甜頭。
再講，同系位元堂（897）上星期臨尾兩個交易日，大成交發力，最多升咗24%，但宏安郁都未郁過，宏安有point炒落後兼炒同氣連枝。呢轉短打，博宏安NAV收窄到70%，目標價係3.9仙，現價潛在回報率44%。
錢雋