公司慳妹遞咗段新聞畀敏妮睇，原來係一個展銷會嘅報道，展銷商除咗之前以一蚊一隻毛蟹作招徠，臨尾又有一蚊一條魚，吸引唔少人排隊買之餘，仲有唔少傳媒報道。慳妹話：「敏妮，呢篇報道嘅重點係，嗰啲排隊嘅人唔知乜嘢係毛蟹，亦唔知買咗嗰條係乜魚，但見到一蚊有交易，唔蝕底買咗先。」
貪念無分階層
其實呢個好平常，香港人一向聰明醒目，但偏偏因為貪小便宜，搞到因小失大。何況「貪」可以話係無分國籍、無分階級。近排睇報紙雜誌電視台嘅新聞回顧特輯，就有唔少雷曼、accumulator苦主，因為貪高息，結果輸得好傷。好似之前好多富豪投資accumulator，就輸唔少，不過，轉個頭佢哋已經有「投資」新寵，就係可換股債券（convertiblebond，CB）。
敏妮睇過某則新聞報道，啲富豪咁有興趣，原因係100萬蚊嘅CB，幾年後先到期，發行商用70萬賣畀啲富豪，如果長年期啲嘅CB，只係賣50萬。
買咗之後冇息收，只要到期，間公司唔摺埋，佢就收到100萬。敏妮㩒吓計數機，就以成本70萬蚊，6年後收番100萬計，年回報率差唔多6厘。
高風險高回報
比起喺銀行做定存得雞碎咁多息，年息6厘，唔可以話唔高回報，雖然話啲富豪買嘅CB多數都係由大藍籌出，而且一籃子買十隻八隻，博唔會間間都執，但敏妮細細個已經聽「高風險高回報」，今年9月之前，又有邊個會諗到雷曼兄弟都會摺埋。
一蚊一隻蟹、一蚊一條魚，就算唔識整，輸極都係一蚊，但投資嘅嘢，隨時輸身家，睇吓近排嗰啲新聞回顧節目，咪話唔欷歔。總之新嘅一年，敏妮希望大家喺投資市場「出入平安」，新年進步。
溫敏妮
http://wanmanli.com/blogs/