易手後嘅《信報》，兩大台柱林行止、曹仁超仍然留守坐鎮每日筆耕，不過曹仁超早已表態想退下火線，事關寫咗幾十年，真係寫到夠皮。八方聽《信報》中人講，曹Sir本來決定出年1月起減產，唔會每天寫《投資者日記》，但因為一啲技術性問題，曹Sir減產大計可能要略為押後，即係話短期內讀者仍然可以每日睇到佢專欄。
不過天下無不散之筵席，曹Sir嘅fans可能要有心理準備第日冇得日日睇《投資者日記》，據講曹Sir理想係個人專欄唔使日日見報，篇幅亦可以短小精幹一啲。至於係以周記或其他形式繼續執筆，《信報》中人話暫時未有最後定論，總之曹Sir唔會封筆住。