亞視嗰齣「魔童維新極速流產」雖然已經落幕，但嚟緊要點搞，班高層仲有排煩。咁嘅時勢下，剛剛重掌新聞部帥印嘅高級副總裁梁家榮，噚日就親自揸車去旺角花墟買番棵鐵樹。堪輿學家教落，鐵樹有招財擋煞作用，點知梁家榮棵樹都未運到返屋企，佢已經喺彌敦道撞低個內地女遊客。
揸車撞傷女遊客
噚日下晝1點幾，梁家榮揸住部紅色三菱四驅車，去旺角花墟買咗棵鐵樹，點知返屋企途中架車行唔夠幾條街，就喺彌敦道同亞皆老街交界嘅交通黑點出事。據講，事發時三個內地女遊客喺安全島衝出馬路，梁家榮即刻扭左軚閃避，但右邊車頭擋風玻璃仍然撞到其中一個44歲姓田嘅女士。
梁家榮事後落車慰問傷者，但傷者唔識廣東話，佢惟有轉台用普通話叫佢唔好亂郁，然後報警。三位女士原來係嚟自甘肅嘅三姊妹，攞雙程證嚟香港探親。可能係人生路不熟，據佢哋同警方講，過馬路時冇留意交通燈號。
早前王維基入主亞視冇耐，56歲嘅梁家榮就宣佈離職；到王維基閃電落台前夕，梁家榮唔止獲得公司挽留，仲升職做埋高級副總裁，表面睇嚟都黑唔晒！對於今次買鐵樹要擋乜嘢煞，裏面又暗藏乜嘢玄機，梁家榮就話唔想多講有關亞視嘅事務，只肯講：「呢次真係無妄之災。」唔好誤會，佢講嘅係今次交通意外，唔係講之前嘅亞視風雲。據講，梁家榮噚晚已經去咗醫院，探望情況嚴重嘅傷者。
鐵樹可招財擋煞
既然梁家榮唔肯多講，八方惟有請教堪輿學家李丞責。李師傅話，風水學上鐵樹可以用嚟招財擋煞，如果所種嘅鐵樹開花，仲可以招來奇迹。李師傅指出，傳統上冬至後已進入牛年，屬龍嘅梁家榮犯太歲，今年運氣稍差，事業上容易有阻滯，仲會有無妄之災，將鐵樹擺喺屋企嘅煞位確係可以消災解難。李師傅仲奉勸梁家榮，今年最好避免參與紅白二事。
mailto:[email protected]
