羽翹為蕭定一旗下新人，本來不為人熟識，很多人都誤以為她是Freeze其中一名成員，但自從早前羽翹自爆倪震於facebook曾留言約她食飯，之後她的名字連日出現於各大報章上。而事實上，羽翹曾客串由鍾欣桐（阿嬌）主演的《出水芙蓉》，但自從年初爆發疑似藝人淫照事件後，電影上映無期，羽翹無奈自嘲說：「今次唔係出水芙蓉呀，係潛水芙蓉呀。」
羽翹早前在閱讀有關倪震、周慧敏分手新聞時，看到倪震曾於網上留言約會裴蓓，其間她不經意向蕭若元透露：「有咩出奇啫，倪震都有約過我啦。」於是蕭若元與其經理人蕭定一覺得事態嚴重，應該將此事宣告大家。之後有關倪震的媾女名單中多了羽翹這個名字。
爆倪震識冧女
羽翹日前接受訪問時表示於6，7月時於公開活動與倪震有一面之緣，但倪震當時表現不是太熱情，她說：「當日喺蘭桂坊一個活動上見到倪生，第一個感覺係覺得佢好有風度，當時佢冇問我拎contact。但後來佢喺facebook度add咗我，之後就開始有留言畀我，都係圍繞工作上嘅事，我都有同佢大讚周小姐係玉女典範，不過佢就唔係有太大反應。直至佢偷食事件前兩星期，佢就留言約我食飯，不過我就冇再回覆佢啦。」羽翹又回憶第一次見倪震時，她向對方提及自己想以清純路線打入樂壇，倪震反問她說：「乜你覺得喺Freeze身邊可以做到玉女咩，於是我同佢講我形象一啲都唔負面，佢就鼓勵我叫我畀心機，當時我聽到佢呢句說話都feel到佢對Freeze有啲貶義。」
當問到羽翹為何不應約與倪震吃飯，她解釋是怕被記者影到，她說：「唔知點解佢每次同後生女食飯都俾人影到，我好擔心同佢食飯的話會俾人影到。」
講到倪震的為人，羽翹指他對女性表現關心，很易會令人誤會，又認為倪震與張茆偷食一事頗震撼，她說：「佢只係留言畀我，相對佢同張茆嗰件事就震撼好多啦，佢咁做都幾過份，同埋我喺佢面前提起周小姐，佢都冇乜反應，我估好多男人喺其他女仔面前，都唔會多提自己女友。」
對Freeze改觀
原來羽翹於07年畢業於香港大學生物系，她多年前已認識現時經理人蕭定一，在Year3時曾客串電影《出水芙蓉》，後來簽約成為阿一旗下藝人，對於與性感組合Freeze同一公司，她坦言初時曾戴有色眼鏡看三位師姐，她說：「我簽阿一時，都好擔心外界唔知點樣睇我，我當時都同阿一講我唔啱你㗎，我唔會整容，之後佢解釋畀我聽係想簽一個行清純路線嘅女新人。」
不過羽翹與Freeze見面多次後對她們改觀，她覺得三人EQ很高，就算外間的抨擊如何不留情都不會動氣，她續說：「我都好想同Freeze講句唔好意思，未入行前我覺得佢哋整容好似博出位咁，之後一齊出席活動好多人誤以為我都係有整容，係Freeze新成員，我自己都好唔開心。相處過之後先發覺佢哋三個做事好認真，如果唔係因為整容新聞影響，佢哋嘅成績應該更加好。」
嘆阿嬌好可憐
提到羽翹曾客串的《出水芙蓉》，對於電影上映無期，她只好自嘆倒楣，還笑言：「今次唔係出水芙蓉呀，係潛水芙蓉呀，都唔知邊個唔好彩。」自從爆發疑似藝人淫照事件後，羽翹於配音及影海報時，曾與鍾欣桐見面，她透露阿嬌當時瘦了很多，更戥對方可憐，她表示：「我見到佢當然唔會提起嗰件事啦，其實佢對我好好，我作為一個新人又冇知名度，但係我生日時，佢哋都有同我慶祝。」
撰文：林妃
攝影：陳慧安
髮型：Sing（O4Orient4）
場地提供：O4HairStylingGroupLimited
服裝提供：Quicksilver