台灣人氣組合S.H.E噚日喺九展舉行「S.H.E宇宙聯盟聖誕大派對」，同1,500位歌迷歡度BoxingDay，佢哋搞咗個「比你賤S.H.E模仿大賽」，有歌迷竟然擺偶像嘅緋聞上枱，分別扮演Ella嘅緋聞男友吳尊、同Selina傳過撻着嘅羅志祥，以及扮Hebe嘅緋聞情人周杰倫，𠱁到S.H.E拍爛手掌兼同假緋聞男友擁抱。
「好像懷孕一樣」
有參賽男歌迷模仿S.H.E，但係佢哋下身就只係着住條緊身褲，搞到下體現形，連S.H.E都睇到大皺眉頭，話男fans醜化佢哋。Hebe話：「好害怕，看到扮我的那個有大肚子凸出來，好像懷孕一樣，令人很不舒服。」Ella亦大踩男fans表現誇張，又唔打底令下體現形。
S.H.E嘅派對門票分為非會員價320蚊同會員價290蚊，雖然佢哋只係唱咗三首歌，但歌迷完全唔介意，仲睇得好投入。
S.H.E透露前日到銅鑼灣行街買禮物同食聖誕大餐，仲同工作人員交換禮物，Selina抽到Ella所送、寫住「love」同「you」嘅一對電話繩，佢話：「因為現場好多女生，她送這禮物是希望大家早日找到另一半呢。」