最近的開倉集中在時裝界，對於各位潮牌人士來講都大嘆無癮，今期終於等到波鞋界減價！平時行經尖沙嘴必行的Dahood遇海嘯結業一次過推晒adidas、Lacoste、converse進行大割引，減至半價。幾時都話做《蘋果》讀者有着數，記得掃貨時帶埋呢份報道去，除converse外，其餘貨品即場再九折呀！
記者：葉雪芯
攝影：伍慶泉
Model：Lear@MMHK
Hair&Makeup：Sammi
最平$240買走adidassuperstar
仲以為減價潮去到聖誕前已經減到七七八八，點知過晒BoxingDay都仲有筍貨執，睇來大家減開有鋪癮，總之就是要你打開荷包放亁水為止。買波鞋必去之地Dahood唔需要再多介紹，專賣fashionable款式的各大牌波鞋，其中adidas是鎮場牌子之一，推出新款程度拍得住專門店，甚至部份日本、外國特別版，他們都有本事返到貨。場內所見superstar最齊款，亦有少量的stansmith，望一望價錢牌，$250買一對adidas？心諗一定係眼花睇錯，再問Sales哥哥，統統半價無花無假，《蘋果》讀者仲有九折喎，二話不說拎起兩對走人啦！
Lacoste七折 憑此報再九折
與店主Billy算相熟，打電話問問做乜咁好死劈價益街坊，原來是因為結業：「尖沙嘴做咗四、五年，人流始終麻麻，睇多過買，家陣經濟唔好，減價是唯一出路，未來考慮搬舖，今次真係認錢唔認貨，除了adidas減至半價，Lacoste、converse都會做七折。」Billy講到明係益《蘋果》讀者，拎住此報道買adidas和Lacoste，折後再九折，雖然converse無份，而且單睇折頭唔算割喉，不過計番原價，七折後二百蚊唔使，都仲係平過出面市價一截，係咪抵買先？
Shoplist：
Dahood（23170101）
尖沙嘴漆咸道南115號地舖
‧必須憑報紙剪報才可以享有優惠。